गणेशोत्सवाच्या निमित्ताने पुण्यातील काही प्रमुख रस्ते १ सप्टेंबर ते ५ सप्टेंबर पर्यंत सायंकाळी ५ नंतर बंद राहणार आहेत. लक्ष्मी रस्ता, छत्रपती शिवाजी महाराज रस्ता, बाजीराव रस्ता, टिळक रस्ता आणि इतर काही रस्त्यांवर वाहतुकीस बंदी असेल.
पुणे : गणेशोत्सवाच्या धामधुमीत पुण्याची वाहतूक आजपासून बदलणार आहे. गणेश मंडळांचे देखावे पाहण्यासाठी होणारी गर्दी लक्षात घेऊन वाहतूक पोलिसांनी एक महत्त्वाचा निर्णय घेतला आहे. आज रविवार, दि. 1 सप्टेंबरपासून शहरातील काही प्रमुख रस्ते सायंकाळी 5 वाजेनंतर वाहतुकीसाठी बंद ठेवण्यात येणार आहेत. त्यामुळे, बाहेर पडण्यापूर्वी वाहतुकीतील हे मोठे बदल जाणून घेणे आवश्यक आहे. वाहतूक शाखेचे पोलीस उपायुक्त हिंमत जाधव यांनी नागरिकांना आवाहन केले आहे की, गर्दी टाळण्यासाठी मुख्य रस्त्यांऐवजी पर्यायी मार्गांचा वापर करावा. हे बदल 5 सप्टेंबरपर्यंत लागू राहणार आहेत.
वाहतुकीसाठी बंद असणारे महत्त्वाचे रस्ते
लक्ष्मी रस्ता: हमजेखान चौक ते टिळक चौक.
छत्रपती शिवाजी महाराज रस्ता: गाडगीळ पुतळा चौक ते देशभक्त केशवराव जेधे चौक, स्वारगेट.
Related Articles
बाजीराव रस्ता: पूरम चौक ते अप्पा बळवंत चौक.
टिळक रस्ता: मराठा चेंबर ऑफ कॉमर्स ते हिराबाग चौक.
इतर: सिंहगड गैरज, दिनकरराव जवळकर चौक, सणस रस्ता, पानघंटी चौक, कोहिनूर चौक, आदी मार्गांवरही वाहतुकीस बंदी असणार आहे.
पार्किंगवरही बंदी
मंडई परिसरातील गर्दीमुळे जिजामाता चौक ते मंडई, मंडई ते शनिपार, शनिपार ते फुटका बुरूज आणि अप्पा बळवंत चौक या ठिकाणी वाहने उभी करण्यास मनाई करण्यात आली आहे.
हे बदल केवळ गणेश मंडळांच्या दर्शनासाठीच नव्हे, तर विसर्जन सोहळ्याच्या वेळी वाहतूक सुरळीत ठेवण्यासाठीही महत्त्वपूर्ण आहेत. वाहनचालकांनी सहकार्य करून पर्यायी मार्गांचा वापर करावा आणि गर्दी कमी होईपर्यंत धीर धरावा, असे आवाहन वाहतूक पोलिसांनी केले आहे.
