Mumbai Pune Expressway Container Accident : मुंबई-पुणे एक्सप्रेसवेवर ब्रेक फेल झालेल्या कंटेनरने २० हून अधिक वाहनांना धडक दिल्याने चार जणांचा मृत्यू झाला आणि १५ जण जखमी झाले. हा अपघात खोपोलीजवळ घडला असून, वाहतूक ठप्प झाली आहे.
मुंबई : मुंबई-पुणे एक्सप्रेसवे आज (शनिवार) एका भीषण अपघाताने हादरला. ब्रेक निकामी झालेल्या एका अनियंत्रित कंटेनरने तब्बल २० हून अधिक वाहनांना धडक दिल्याने चार जणांचा जागीच मृत्यू झाला, तर किमान १५ प्रवासी जखमी झाले आहेत. या अपघातानंतर एक्सप्रेसवेवर प्रचंड वाहतूक कोंडी निर्माण झाली असून, वाहनांच्या ५ किलोमीटर लांब रांगा लागल्या आहेत.
थरकाप उडवणारा प्रसंग, ब्रेक फेल, २० गाड्या चक्काचूर!
मिळालेल्या माहितीनुसार, लोणावळा-खंडाळा घाटातून मुंबईच्या दिशेने येणाऱ्या एका कंटेनर ट्रकचे ब्रेक अचानक निकामी झाले. चालकाचे नियंत्रण सुटल्याने हा भरधाव कंटेनर मार्गावर असलेल्या अनेक वाहनांना चिरडत पुढे गेला. ही धडक इतकी भीषण होती की, यामध्ये तीन वाहनांचा पूर्णपणे चक्काचूर झाला, तर इतर वाहनांचेही मोठे नुकसान झाले आहे. मृतांमध्ये चार जणांचा समावेश असून, जखमींना तातडीने रुग्णालयात दाखल करण्यात आले आहे.
वीकेंडच्या गर्दीत वाहतूक ठप्प
मुंबई-पुणे एक्सप्रेसवेवर नेहमीच वाहनांची वर्दळ असते, खासकरून वीकेंडला ही गर्दी मोठ्या प्रमाणात वाढते. आजचा अपघात खोपोलीजवळील नवीन बोगदा आणि फूडमॉल हॉटेल दरम्यान मुंबईकडे जाणाऱ्या लेनवर घडला. अपघातामुळे संपूर्ण मार्ग ठप्प झाला असून, अनेक पर्यटक आणि प्रवाशांना तासाभराहून अधिक काळ अडकून पडावे लागले आहे.
Related Articles
घटनेची माहिती मिळताच, खोपोली पोलीस आणि बचाव पथके तातडीने घटनास्थळी दाखल झाली आहेत. सध्या मदतकार्य वेगाने सुरू असून, जखमींना बाहेर काढण्याचे आणि अपघातग्रस्त वाहने बाजूला करण्याचे काम सुरू आहे, जेणेकरून वाहतूक पूर्ववत करता येईल. या अपघातामुळे प्रवाशांना मोठ्या त्रासाला सामोरे जावे लागत आहे.
