पत्रकारांना 'गुलाम' म्हणणाऱ्या राहुल गांधींवर प्रेस क्लबचा संताप

मुंबई : महाराष्ट्र विधानसभा निवडणुकीच्या प्रचारसभेत लोकसभेतील विरोधी पक्षनेते राहुल गांधी यांनी पंतप्रधान नरेंद्र मोदी यांच्यावर टीका करताना 'पत्रकार एक प्रकारे भाजपचे गुलाम' असे म्हटल्याने वाद निर्माण झाला आहे.

राहुल गांधी यांच्या वक्तव्याचा निषेध करत मुंबई प्रेस क्लबने, 'असे वक्तव्य पत्रकारांच्या भावना दुखावते. राहुल गांधी यांनी कधी भारतातील पत्रकारांना भेडसावणाऱ्या आव्हानांवर, त्यांच्या समस्यांवर आणि एकूणच पत्रकारितेच्या समस्यांवर भाष्य केले आहे का?' असा सवाल केला आहे.

राहुल गांधी नेमके काय म्हणाले?:

शनिवारी अमरावती येथे भाषण करताना राहुल गांधी म्हणाले, 'मी आरक्षण मर्यादा वाढवावी असे म्हटल्यास पंतप्रधान मोदी 'राहुल गांधी आरक्षणाच्या विरोधात आहेत' असा आरोप करतात. हे माध्यमेही प्रश्न न विचारता बातमी देतात. पत्रकार भाजपचेच आहेत. ते माझ्याकडे पाहून हसतात तेव्हा मला 'हो, आम्ही भाजपचे आहोत' असे म्हणत असल्यासारखे वाटते. यात त्यांचा काही दोष नाही. त्यांना काम करायचे आहे, पगार हवा आहे, मुलांना सांभाळायचे आहे, शिक्षण द्यायचे आहे, जेवायचे आहे. ते त्यांच्या मालकांच्या विरोधात काम करू शकत नाहीत. एक प्रकारे ते गुलामच आहेत' असे काही माध्यमांनी वृत्त दिले आहे. या वृत्तांचा आधार घेत मुंबई प्रेस क्लबने निषेध व्यक्त केला आहे.