खोडा घालायला आलेल्या सावत्र भावांना संधी येईल तेव्हा जोडा दाखवा : सीएम शिंदे

पुणे: पुण्यात शनिवारी मुख्यमंत्र्यांच्या हस्ते माझी लाडकी बहीण योजनेचा शुभांरभ करण्यात आला. यावेळी बोलताना मुख्यमंत्री एकनाथ शिंदे म्हणाले की, ‘आज मोठ्या मैदानात लाखो बहिणींना बोलावून हा सोहळा करायचा होता. पण स्टेडियममध्ये घेतला. चार मोठे हॉल आहेत. त्यात लाडक्या बहिणी बसल्या आहेत. हा कार्यक्रम लाइव्ह दिसत आहे. कॅबिनेटमध्ये मी सांगितले होते की रक्षा बंधनाच्या आधी हे पैसे पोहोचले पाहिजे. खातं चालतं की नाही हे बघायचं होतं. त्यामुळे एक रुपया टाकायचा सल्ला काहींनी दिला. पण अजितदादा, फडणवीस यांनी सांगितले तीन हजार टाका आणि ट्रायल रन घ्या. लाडक्या बहिणी सांगत असतात खात्यात पैसे आले. तेव्हापासून राखी बांधायचा कार्यक्रम सुरू झाला. बहिणींच्या आयुष्यातील हा आनंदाचा दिवस आहे. हा आनंद साजरा करण्यासाठी नारी शक्ती आल्या आहेत.’

‘मी तुम्हाला वंदनही करतो. कारण एवढ्या मोठ्या संख्येने आलात. अनेक बहिणींच्या डोळ्यात आनंदाश्रू पाहिले. सरकारच्या प्रती भावांच्या प्रती आदर पाहिला. दुसरे काय पाहिजे. तुमच्या जीवनात सुखाचे दिवस यावेत हीच प्रामाणिक इच्छा आहे. या योजनेबद्दल सर्वांशी चर्चा झाली. त्याची अंमलबजावणी कशी करायची. आर्थिक वर्षाचे नियोजन कसे करायचे हे पाहत होतो. तुम्ही प्रपंच चालवताना कसरत करता, तसे सरकार चालवताना आम्हाला कसरत करावी लागते. पायभूत सुविधांसाठी कर्ज घ्यावे लागते, पगार असतो, पेन्शन असते या सर्व गोष्टी करायच्या असतात. पण बहिणींनाही काही तरी द्यायचे होते. म्हणून ही योजना जाहीर केली.’

‘विरोधक म्हणाले लाडक्या भावाचे काय. यांना कधी तरी लाडक्या भावावर प्रेम होते का. असते तर ते सोडून गेले असते का. पण आम्ही लाडक्या भावांनाही शिष्यवृत्ती द्यायला सुरुवात केली. महिलांना तीन गॅस सिलिंडर मोफत देण्याचा निर्णय घेतला.’

‘मी सर्वांना पुरुन उरलोय. सावत्र कपटी भावांवर मात करून आलो आहे. फक्त त्यांना लक्षात ठेवा. त्यांना योग्यवेळी जागा दाखवा. भीक देता का, विकत घेता का, लाच घेता का असे शब्द काढायला लागले. या बहिणींबद्दल असं बोलताना जनाची नाही तरी मनाची वाटायला हवी होती. ते कोर्टातही गेले. कोर्टाने त्यांची याचिका फेटाळली आणि बहिणींच्या बाजूने निकाल दिला. खोडा घालायला आलेल्या सावत्र भावांना संधी येईल तेव्हा जोडा दाखवा.’ अशी टीका ही त्यांनी विरोधकांवर केली.

आणखी वाचा :

माझी लाडकी बहीण योजनेचे पैसे मिळाले नाहीत?, घरबसल्या आधार लिंक करा