तब्बल ४०९ दिवसांनी, महादेवी ऊर्फ माधुरी हत्तीण गुजरातच्या पुनर्वसन केंद्रातून नंदनी मठात परतली. तिच्या स्वागतासाठी हजारो भाविक जमले होते आणि मठाधिपतींनाही अश्रू अनावर झाले.
मुंबई : नंदनी येथील स्वस्तिश्री भट्टारक पट्टाचार्य महास्वामी संस्थान मठाची महादेवी, जिला माधुरी नावानेही ओळखलं जातं, ती तब्बल ४०९ दिवसांनी शुक्रवारी रात्री घरी परतली. मध्यरात्री दीडच्या सुमारास ती मठात पोहोचली, तेव्हा तिच्या स्वागतासाठी हजारो भाविकांची गर्दी जमली होती. वर्षभरापेक्षा जास्त काळाची प्रतीक्षा महादेवीच्या घरवापसीने भावनिकरित्या संपली.
मठाच्या निशिधिका भागात प्रवेश करताच भाविकांनी 'लाडकी महादेवी' अशा घोषणा देत तिच्यावर फुलांची उधळण केली. महादेवीला परत आलेलं पाहून मठाधिपती स्वस्तिश्री भट्टारक पट्टाचार्य महास्वामी यांना अश्रू अनावर झाले. नंदनी मठ हा महाराष्ट्र आणि उत्तर कर्नाटकातील हजारो भाविकांसाठी एक पवित्र श्रद्धास्थान आहे.
महादेवी गुजरातच्या जामनगरमधील हत्ती पुनर्वसन केंद्रातून मध्यरात्रीच्या सुमारास नंदनीला पोहोचली. तिच्यासोबत वन विभागाचे कर्मचारी, 'वनतारा' टीम आणि एका वैद्यकीय पथकासह ४२ जणांची टीम होती. या टीमने तिला नंदनी मठाच्या आवारात उभारलेल्या 'माधुरी निवास'मध्ये सुखरूप पोहोचवलं. महादेवीसाठी एक खास निवारा तयार करण्यात आला आहे. तिच्या परतल्यानंतर तिच्या राहण्याची आणि देखभालीची सर्व योजना संस्थेने आखली आहे.
Related Articles
महादेवी मठात पोहोचण्यापूर्वीच तिच्या स्वागताला सुरुवात झाली होती. किणी टोल नाक्यापासून नंदनी गावातील गांधी चौकापर्यंतच्या रस्त्यावर शेकडो भाविक जमले होते. तिच्या परतण्याच्या आनंदात लोकांनी घरासमोर रांगोळ्या काढल्या होत्या.
व्हायरल व्हिडिओ पहा
गांधी चौकात ॲनिमल ॲम्ब्युलन्स पोहोचताच भाविकांनी ती फुलांनी सजवली. हा सगळा जल्लोष सुरू असतानाच महादेवीला मठात आणण्यात आलं.
वर्षभरापासून तिची वाट पाहणाऱ्या स्थानिक नागरिकांसाठी हा एक अत्यंत भावनिक क्षण होता. महादेवीच्या स्वागतावेळी 'वनतारा'चे सीईओ विहान करानी, नंदनी मठाचे स्वस्तिश्री जिनसेन भट्टारक पट्टाचार्य महास्वामी, वरूर मठाचे स्वस्तिश्री धर्मसेन भट्टारक आणि कोल्हापूर मठाचे स्वस्तिश्री लक्ष्मीसेन भट्टारक महास्वामी उपस्थित होते.
