जळगाव जिल्ह्यातील चोपडा शहरात प्रेमविवाहाच्या रागातून एका निवृत्त पोलीस उपनिरीक्षकाने आपल्या मुलीची गोळी मारून हत्या केली. लग्नाच्या कार्यक्रमात झालेल्या या गोळीबारात जावई गंभीर जखमी झाला आहे.
जळगाव जिल्ह्यातील चोपडा शहरात प्रेमविवाहाच्या रागातून ऑनर किलिंगची धक्कादायक घटना घडली आहे. सीआरपीएफचे निवृत्त पोलीस उपनिरीक्षक (पीएसआय) किरण मांगले यांनी आपल्या लग्नाच्या कार्यक्रमात गोळीबार केला. या गोळीबारात त्यांची मुलगी तृप्ती मांगले हिचा जागीच मृत्यू झाला, तर जावई अविनाश वाघ गंभीर जखमी झाला आहे. या घटनेने संपूर्ण जळगाव जिल्ह्यात खळबळ उडाली आहे.
मिळालेल्या माहितीनुसार, साधारण वर्षभरापूर्वी तृप्ती हिने अविनाश वाघ यांच्याशी प्रेमविवाह केला होता. विवाहानंतर हे दाम्पत्य पुण्यात राहत होते. अविनाशच्या नातेवाईकांच्या लग्नासाठी दोघंही शनिवारी चोपडा शहरात आले होते. याची माहिती मिळताच किरण मांगले चोपड्यात आले आणि थेट लग्नस्थळी पोहोचत तृप्ती आणि अविनाशवर गोळ्या झाडल्या. गोळीबारात तृप्तीचा जागीच मृत्यू झाला, तर अविनाश गंभीर जखमी झाला आहे.
घटनेनंतर संतप्त जमावाने किरण मांगले यांना पकडून त्यांना बेदम मारहाण केली. त्यांची प्रकृती गंभीर असून, त्यांच्यावर जळगाव जिल्हा रुग्णालयात उपचार सुरू आहेत. या प्रकरणी पोलिसांनी गुन्हा दाखल केला असून, पुढील तपास सुरू आहे. या घटनेमुळे ऑनर किलिंगच्या वाढत्या घटनांबाबत चिंता व्यक्त केली जात आहे. प्रेमविवाह केल्याच्या कारणावरून मुलीच्या वडिलांनीच तिचा जीव घेतल्याने समाजात खळबळ उडाली आहे.
