Hadapsar Railway Station: पुणेकरांची 'लाईफलाईन' सुसाट! हडपसर रेल्वे स्थानकाचा कायापालट; आता चौथ्या प्लॅटफॉर्मला ग्रीन सिग्नल!

Hadapsar Railway Station: पुणे रेल्वे स्थानकावरील ताण कमी करण्यासाठी हडपसर स्टेशनवर चौथ्या फलाटाला मंजुरी मिळाली, ज्यामुळे ते महत्त्वाचे सॅटेलाइट टर्मिनल बनेल. यामुळे हडपसर, खराडी, वाघोली परिसरातील नागरिकांना लांब पल्ल्याच्या गाड्या पकडणे सोपे होणारय

Image Credit : Asianet News

पुणेकरांची 'लाईफलाईन' सुसाट! हडपसर रेल्वे स्थानकाचा कायापालट

पुणे: पुणे रेल्वे स्थानकावरील प्रवाशांचा वाढता ताण कमी करण्यासाठी 'सॅटेलाइट टर्मिनल' म्हणून ओळखल्या जाणाऱ्या हडपसर रेल्वे स्थानकाच्या विस्ताराला आता मोठी गती मिळाली आहे. रेल्वे बोर्डाने हडपसर स्थानकावर चौथ्या फलाटाच्या (Platform No. 4) बांधकामाला अधिकृत मंजुरी दिली असून, यामुळे पूर्व पुण्यातील दळणवळणाचे चित्र पालटणार आहे. 

Image Credit : our own

पुणे स्टेशनला जाण्याची कटकट संपणार!

हडपसर रेल्वे स्थानकाचा विस्तार झाल्यामुळे हडपसर, मांजरी, वाघोली, खराडी आणि मगरपट्टा सिटी या परिसरातील नागरिकांना आता लांब पल्ल्याच्या गाड्या पकडण्यासाठी मुख्य पुणे स्टेशनच्या गर्दीत जाण्याची गरज भासणार नाही. विशेषतः आयटी कंपन्यांमध्ये काम करणाऱ्या हजारो तरुण प्रोफेशनलसाठी हे टर्मिनल वरदान ठरणार आहे. 

Image Credit : social media

नव्या फलाटाचे गणित आणि रेल्वेचा मास्टरप्लॅन

नव्या गाड्यांची सोय: एक अतिरिक्त फलाट वाढल्यामुळे या स्थानकावरून दररोज किमान ३ ते ४ नवीन गाड्या सोडणे किंवा थांबवणे रेल्वे प्रशासनाला शक्य होणार आहे.

प्रचंड क्षमता: सध्या या स्थानकावरून दररोज ४ हजार प्रवासी प्रवास करतात, नव्या विस्तारानंतर ही संख्या दुप्पट होऊ शकते.

६५० मीटरचा आग्रह: रेल्वे बोर्डाने सध्या ४०० मीटर लांबीच्या (१४ डबे) फलाटाला मंजुरी दिली असली, तरी प्रशासन २४ डब्यांच्या मोठ्या गाड्यांसाठी ६५० मीटर लांबीच्या फलाटासाठी आग्रही आहे.

७ कोटींचा खर्च: या संपूर्ण प्रकल्पासाठी साधारण ७ कोटी रुपये खर्च अपेक्षित असून, लवकरच याची निविदा प्रक्रिया (Tenders) सुरू होणार आहे. 

Image Credit : iSTOCK

प्रशासनाची भूमिका

रेल्वे जनसंपर्क अधिकारी हेमंत कुमार बेहरा यांनी दिलेल्या माहितीनुसार, या विस्तारामुळे हडपसर स्थानकाची कार्यक्षमता वाढणार आहे. तांत्रिक अडथळे दूर झाल्यामुळे भविष्यात येथून अधिक रेल्वे गाड्या सुरू करणे सोपे होईल, ज्याचा थेट फायदा पुणेकरांना होईल.

पुण्याच्या पूर्व भागाचा विकास पाहता, हडपसर टर्मिनल हे आगामी काळात पुण्याचे 'दुसरे मुख्य रेल्वे केंद्र' म्हणून उभे राहील, यात शंका नाही!