नवी मुंबईत ‘एज्युसिटी’ प्रकल्पासाठी ८ हजार कोटींचे सामंजस्य करार झाले आहेत. या प्रकल्पांतर्गत आंतरराष्ट्रीय विद्यापीठे आणि जागतिक दर्जाचे स्टुडिओ उभारले जातील, ज्यामुळे शिक्षण, मनोरंजन आणि रोजगार क्षेत्रात मोठी क्रांती होईल.
नवी मुंबई – परदेशात उच्च शिक्षण घेण्याची स्वप्ने पाहणाऱ्या भारतीय विद्यार्थ्यांसाठी आणि अभिजात कौशल्यांचा जागतिक मंचावर डंका वाजवू इच्छिणाऱ्या तरुणाईसाठी एक सुवर्णसंधी निर्माण झाली आहे. मुख्यमंत्री देवेंद्र फडणवीस यांच्या उपस्थितीत ‘वेव्हज २०२५’ परिषदेमध्ये नवी मुंबईत उभारल्या जाणाऱ्या ‘एज्युसिटी’ प्रकल्पासाठी एकूण आठ हजार कोटी रुपयांचे सामंजस्य करार झाले. यामुळे महाराष्ट्र शैक्षणिक, तांत्रिक आणि रोजगारनिर्मिती क्षेत्रात नवा इतिहास रचणार आहे.
‘एज्युसिटी’ म्हणजे जागतिक दर्जाच्या शिक्षणाचा केंद्रबिंदू
सिडकोमार्फत युनिव्हर्सिटी ऑफ यॉर्क आणि युनिव्हर्सिटी ऑफ वेस्टर्न ऑस्ट्रेलिया या दोन आंतरराष्ट्रीय विद्यापीठांसोबत प्रत्येकी १५०० कोटी रुपयांचे करार करण्यात आले आहेत. या विद्यापीठांचे कॅम्पस भारतात मूळ विद्यापीठाच्या दर्जाप्रमाणेच असतील, असा विश्वास यावेळी देण्यात आला. अजून तीन विद्यापीठांशी करार अंतिम टप्प्यात असून, पाच विद्यापीठांशी प्राथमिक बोलणी सुरू असल्याची माहिती फडणवीस यांनी दिली.
मनोरंजन उद्योगात भारताचे ‘लीडरशिप’
'गोदरेज' आणि 'प्राईम फोकस' या दोन नामवंत कंपन्यांसोबत ५ हजार कोटींचे करार करण्यात आले आहेत. प्राईम फोकसद्वारे ३ हजार कोटींच्या गुंतवणुकीतून एक जागतिक दर्जाचा स्टुडिओ उभारला जाणार असून २५०० नव्या रोजगार संधी निर्माण होतील. याचबरोबर गोदरेजकडून पनवेल येथे एए स्टुडिओसाठी ५०० कोटींचा पहिला टप्पा सुरू होणार असून २०३० पर्यंत एकूण गुंतवणूक २ हजार कोटींवर जाईल आणि एकूण २५०० रोजगार उपलब्ध होतील.
Related Articles
‘एआय’ आणि शिक्षण यांचा संगम – भविष्यातील भारत
मुख्यमंत्री फडणवीस यांनी ‘मनोरंजन आणि एआय’ या क्षेत्रांमध्ये भारत जागतिक नेतृत्व करेल, असा विश्वास व्यक्त केला. ‘एआय’ तंत्रज्ञानावर आधारित शिक्षण सुविधा नवी मुंबईत तयार होणार असून, या क्षेत्रातील कौशल्यं देशांतर्गत आणि आंतरराष्ट्रीय पातळीवर घेऊन जाण्याचा प्रयत्न सरकार करत आहे.
‘निफ्टी वेव्हज् इंडेक्स’द्वारे गुंतवणुकीचे नवे द्वार
या परिषदेत NSE इंडायसेस लिमिटेडने ‘निफ्टी वेव्हज् इंडेक्स’चा शुभारंभ केला. या निर्देशांकात मीडिया, गेमिंग आणि मनोरंजन क्षेत्रातील ४३ कंपन्या समाविष्ट आहेत, ज्यामुळे या क्षेत्रात गुंतवणूक वाढेल.
