राष्ट्रवादी काँग्रेस शरद पवार गटातील जेष्ठ नेते राजेंद्र शिंगणे यांच्या बुलढाण्यातील घरातील किचनमध्ये मोठा स्फोट झाल्याची घटना समोर आली आहे. किचनमधील फ्रिजच्या कॉम्प्रेसला आग लागल्याने ही दुर्घटना घडली असून संपूर्ण किचन खाक झाले आहे.
Fire Breaks Out At Rajendra Shingne Bungalow : माजी आरोग्यमंत्री आणि राष्ट्रवादी काँग्रेसचे ज्येष्ठ नेते डॉ. राजेंद्र शिंगणे यांच्या बुलढाणा येथील बंगल्यात 18 जून रोजी सायंकाळी एक भीषण स्फोट झाला. चिखली रोडवरील त्यांच्या निवासस्थानी घडलेल्या या घटनेने परिसरात एकच खळबळ उडाली. संध्याकाळी सातच्या सुमारास जोरदार आवाजासह स्फोट होऊन नंतर किचनमध्ये आग लागली. प्राथमिक माहितीनुसार, हा स्फोट फ्रिजच्या कॉम्प्रेसरचा असल्याची माहिती समोर आली आहे. आगीने किचनमधील संपूर्ण साहित्य जळून खाक केलं असून, भिंतींचंही मोठं नुकसान झालं आहे. मात्र, सुदैवाने यावेळी कोणतीही जीवितहानी झाली नाही.
घटनेच्या वेळी डॉ. शिंगणे हे कामानिमित्त नागपूर येथे होते, तर घरात त्यांचे पुत्र पुष्पक शिंगणे, त्यांच्या पत्नी व काही कर्मचारी उपस्थित होते. स्फोटानंतर आगीने मोठ्या प्रमाणावर रौद्ररूप धारण केलं असतानाही पुष्पक शिंगणे यांनी प्रसंगावधान राखत घरातील गॅस सिलिंडर वेळेत बाहेर काढला आणि मोठा अनर्थ टळला. घटनेची माहिती मिळताच बुलढाणा नगरपालिकेच्या अग्निशमन दलाने घटनास्थळी तातडीने पोहोचून आगीवर नियंत्रण मिळवलं. तरीदेखील किचनमधील फ्रिज, एसी आणि अन्य वस्तूंचं मोठं नुकसान झालं आहे.
या स्फोटामुळे घरातील स्वयंपाकघर पूर्णतः खाक झालं आहे. भिंती काळ्या पडल्या असून, आसपासच्या वस्तूंनाही आगीची झळ बसली आहे. घटनेनंतर काही काळ परिसरात गोंधळाचे वातावरण निर्माण झाले होते. सुरक्षारक्षकाने तत्काळ आपत्ती नियंत्रण यंत्रणेला माहिती दिल्याने मोठी हानी टळली. या घटनेने पुन्हा एकदा इलेक्ट्रिक उपकरणांच्या देखभालीच्या गरजेवर लक्ष वेधले आहे. सध्या या स्फोटाच्या नेमक्या कारणांचा तपास सुरू आहे.
Related Articles
याआधी राजकीय नेत्यांच्या घरी आग लागल्याच्या घटना :
दिलीप वळसे-पाटील यांच्या मुंबईतील निवासस्थानी आगीची घटना (एप्रिल 2023)
माजी गृहमंत्री दिलीप वळसे-पाटील यांच्या मुंबईतील अधिकृत निवासस्थानी इलेक्ट्रिकल वायरिंगमधून शॉर्टसर्किटमुळे आगीची घटना घडली होती. ही आग त्यांच्या कार्यालयीन विभागात लागली होती. अग्निशमन दलाने आग तत्काळ आटोक्यात आणली आणि कोणतीही जीवितहानी झाली नाही.
विनायक मेटे यांच्या घरातील आगीची घटना (2021, बीड)
मेटे पाटील विकास परिषदचे अध्यक्ष आणि शिवसंग्रामचे नेते विनायक मेटे यांच्या बीड येथील घरात अचानक शॉर्टसर्किटमुळे आग लागली होती. घरातील फर्निचर, इलेक्ट्रॉनिक वस्तू आणि कागदपत्रांचे मोठे नुकसान झाले होते. आग विझवण्यासाठी स्थानिक अग्निशमन दलाला पाचारण करण्यात आले होते.
(राहा अपडेट, राहा जगाच्या पुढे. सातत्याने अपडेट होणाऱ्या आमच्या फेसबुक आणि एक्स (ट्विटर) पेजला सबक्राईब करुन ताज्या घडामोडी जाणून घ्या.)
आमच्या एशियानेट न्यूज मराठीच्या फेसबुक पेजला सबस्क्राईब करा. त्यासाठी येथे क्लिक करा.
आमच्या एशियानेट न्यूज मराठीच्या एक्स (ट्विटर) पेजला सबस्क्राईब करा. त्यासाठी येथे क्लिक करा.
