तुमचं रेशन कार्ड फाटलंय का? घरबसल्या काढा डिजिटल रेशन कार्ड; जाणून घ्या संपूर्ण माहिती

Digital Ration Card : पारंपरिक कागदी रेशन कार्डच्या समस्यांवर आता डिजिटल, PVC रेशन कार्ड हा आधुनिक उपाय उपलब्ध झाला. केंद्र सरकारच्या ‘मेरा रेशन’ अ‍ॅपद्वारे नागरिक आपले ई-रेशन कार्ड डाउनलोड करू शकतात, एटीएम कार्डप्रमाणे टिकाऊ PVC कार्ड बनवू शकतात. 

Image Credit : social media

घरबसल्या काढा डिजिटल रेशन कार्ड

मुंबई : रेशन कार्ड हे सर्वसामान्य नागरिकांच्या दैनंदिन जीवनातील अत्यंत महत्त्वाचे दस्तऐवज आहे. शिधावाटप, सरकारी योजना आणि ओळखीच्या पुराव्यासाठी रेशन कार्डचा मोठ्या प्रमाणात वापर होतो. मात्र पारंपरिक कागदी रेशन कार्ड कालांतराने फाटणे, पुसट होणे किंवा हरवणे ही अनेकांची डोकेदुखी ठरते. पावसाळा, सततची हाताळणी आणि योग्य जतन न झाल्यामुळे शिधापत्रिकेची अवस्था खराब होत असून, त्यामुळे शासकीय दुकानात किंवा कार्यालयात अडचणींचा सामना करावा लागतो. पण आता या समस्येवर सोपा, सुरक्षित आणि आधुनिक उपाय उपलब्ध झाला आहे तो म्हणजे डिजिटल आणि PVC रेशन कार्ड. 

Image Credit : X

‘मेरा रेशन’ मोबाईल अ‍ॅपमुळे मोठा दिलासा

केंद्र सरकारने सुरू केलेल्या ‘मेरा रेशन’ या अधिकृत मोबाईल अ‍ॅपच्या माध्यमातून नागरिकांना आता आपले रेशन कार्ड डिजिटल स्वरूपात सहज मिळू शकते. या अ‍ॅपमुळे केवळ रेशन कार्डची माहिती पाहणेच नव्हे, तर संपूर्ण कार्ड मोबाईलवर उपलब्ध राहते. विशेष म्हणजे या डिजिटल रेशन कार्डच्या आधारे नागरिक PVC म्हणजेच प्लास्टिक रेशन कार्डही तयार करू शकतात. एटीएम कार्डप्रमाणे मजबूत, टिकाऊ आणि जलरोधक असलेले PVC रेशन कार्ड वापरण्यास अधिक सोयीचे ठरत आहे. 

Image Credit : Gemini AI

ई-रेशन कार्ड कसे काढायचे?

डिजिटल रेशन कार्ड मिळवण्यासाठी प्रथम आपल्या स्मार्टफोनमध्ये ‘मेरा रेशन’ अ‍ॅप डाउनलोड करावे लागेल. अ‍ॅप उघडल्यानंतर Beneficiary हा पर्याय निवडावा. त्यानंतर रेशन कार्डशी लिंक असलेला आधार क्रमांक भरून कॅप्चा टाकावा लागतो. ओटीपीच्या मदतीने लॉग-इन प्रक्रिया पूर्ण होते. ही संपूर्ण प्रक्रिया अतिशय सोपी असून काही मिनिटांत पूर्ण होते. 

Image Credit : our own

डिजिटल रेशन कार्ड कसे डाउनलोड करायचे?

लॉग-इन झाल्यानंतर अ‍ॅपच्या मुख्य स्क्रीनवरच डिजिटल किंवा ई-रेशन कार्ड दिसते. या कार्डवर कुटुंबप्रमुखाचे नाव, रेशन कार्ड क्रमांक आणि कुटुंबातील सर्व सदस्यांची सविस्तर माहिती उपलब्ध असते. याच ठिकाणी ई-रेशन कार्ड डाउनलोड करण्याचा पर्याय दिलेला असतो. एका क्लिकवर तुम्ही हे कार्ड PDF स्वरूपात मोबाईल किंवा संगणकावर सेव्ह करू शकता. ही डिजिटल प्रत शासकीय कामांसाठी वैध मानली जाते. 

Image Credit : our own

PVC रेशन कार्ड कसे मिळेल?

डाउनलोड केलेल्या ई-रेशन कार्डच्या PDF प्रतीच्या आधारे नागरिक आपल्या परिसरातील PVC कार्ड प्रिंटिंग सुविधा देणाऱ्या केंद्रातून प्लास्टिक रेशन कार्ड तयार करू शकतात. सध्या सरकारी अ‍ॅपवरून थेट PVC कार्ड मागवण्याची सुविधा नसली, तरी उपलब्ध PDF वापरून कमी खर्चात काही मिनिटांत कार्ड तयार होते. 

Image Credit : our own

PVC रेशन कार्डचे फायदे काय?

PVC रेशन कार्ड टिकाऊ, जलरोधक आणि खिशात ठेवण्यास सोयीचे असते. कागदी कार्डप्रमाणे ते फाटण्याची किंवा खराब होण्याची भीती राहत नाही. तसेच रेशन दुकानात जाताना कार्ड सुरक्षित ठेवण्याचा ताणही मोठ्या प्रमाणात कमी होतो.