ऑपरेशन थिएटरमध्ये जाण्यापूर्वी डॉक्टर हात स्वच्छ धुतात. त्यानंतर जंतूंचा संसर्ग टाळण्यासाठी ते दरवाजाला हात न लावता पाठीने ढकलून आत जातात. यामुळे त्यांचे निर्जंतुक केलेले हात आणि कपड्यांचा पुढचा भाग सुरक्षित राहतो.
टीव्हीवरील मेडिकल मालिकांमध्ये किंवा खऱ्याखुऱ्या रुग्णालयांमध्ये तुम्ही अनेकदा पाहिलं असेल की, डॉक्टर हात धुतल्यानंतर ऑपरेशन थिएटरमध्ये उलटे चालत जातात. ही कोणतीही विचित्र सवय नाही, तर रुग्णालयातील संसर्ग टाळण्यासाठी आणि ऑपरेशन थिएटर निर्जंतुक ठेवण्यासाठी वापरली जाणारी एक अत्यंत महत्त्वाची पद्धत आहे.
एखाद्या डॉक्टरला ऑपरेशन थिएटरमध्ये असं उलटं जाताना पाहणं थोडं विचित्र वाटू शकतं, पण सुरक्षेच्या दृष्टीने हे खूप गरजेचं असतं. सर्जरीदरम्यान सर्व काही स्वच्छ आणि जंतूमुक्त राहावं, हा यामागचा मुख्य उद्देश असतो. फ्लोरिडामधील एमडी डॉक्टर डेव्हिड अब्बासी यांनी इन्स्टाग्रामवर एक व्हिडिओ शेअर केला आहे. त्यात त्यांनी सांगितलंय की, स्क्रब केल्यानंतर (हात स्वच्छ धुतल्यानंतर) सर्जनच्या गाऊनचा पुढचा भाग, त्यांचे हात आणि दंड पूर्णपणे निर्जंतुक झालेले असतात. पण, या प्रक्रियेत गाऊनचा मागचा भाग मात्र निर्जंतुक मानला जात नाही.
ऑपरेशन थिएटरमध्ये जाताना उलटे चालल्यामुळे गाऊनचा पुढचा स्वच्छ भाग चुकूनही दरवाजे, भिंती किंवा इतर कोणत्याही वस्तूंना घासला जात नाही. तसेच, यामुळे नर्सेसना मागून येऊन डॉक्टरांना गाऊन आणि हातमोजे घालण्यास मदत करणं सोपं जातं. सर्जरीची तयारी पूर्ण करत असताना, नर्सेसचा डॉक्टरांच्या निर्जंतुक केलेल्या भागांना स्पर्श होत नाही.
Related Articles
निर्जंतुक केलेल्या हातांनी दरवाजाचे हँडल किंवा इतर कोणत्याही अस्वच्छ पृष्ठभागाला स्पर्श करू नये, असा नियम असतो. त्यामुळे रुग्णालयातील कर्मचारी दरवाजा उघडण्यासाठी त्यांची पाठ, कंबर किंवा खांद्याचा वापर करतात. ऑपरेशन थिएटरमध्ये संसर्ग टाळण्यासाठी अत्यंत कडक नियम पाळले जातात. गाऊन आणि हातमोजे घालण्यापासून ते आतमध्ये वावरण्यापर्यंत, प्रत्येक गोष्ट संसर्गाचा धोका कमी करण्यासाठीच डिझाइन केलेली असते.
सर्जिकल नियमांनुसार, हात स्वच्छ धुतल्यानंतर फक्त छातीपासून कमरेपर्यंतचा पुढचा भाग आणि हात पूर्णपणे निर्जंतुक राहतात. गाऊनचा मागचा भाग मात्र तसा नसतो. त्यामुळे उलटे चालत गेल्यावर डॉक्टरांना त्यांच्या पाठीने दरवाजा ढकलून आत जाता येतं. यामुळे त्यांचे स्वच्छ केलेले हात वर राहतात आणि शरीराचा पुढचा भाग कोणत्याही अस्वच्छ वस्तूला स्पर्श करण्यापासून सुरक्षित राहतो.
