iPhone Air Resale Value come down : ॲपलने लाँच केलेल्या अल्ट्रा-स्लिम मॉडेल आयफोन एअरची केवळ विक्रीच नाही, तर रिसेल व्हॅल्यू (पुनर्विक्री मूल्य) देखील कमी झाल्याचे वृत्त आहे. ॲपलच्या इतिहासातील हा सर्वात मोठा धक्का आयफोन एअरला बसला आहे.
iPhone Air Resale Value come down : ॲपलची सर्वात नवीन आयफोन 17 सीरिज खूप यशस्वी ठरली. पण या सीरिजमधील ॲपलचा प्रयोग असलेला आयफोन एअर मॉडेलची कामगिरी खराब राहिली आहे. खराब विक्रीमुळे सुरुवातीला ॲपलच्या पुरवठादारांनी आयफोन एअर मॉडेलचे उत्पादन कमी केले होते. आता आयफोन एअरची रिसेल व्हॅल्यू (पुनर्विक्री मूल्य) देखील झपाट्याने घसरल्याचे नवीन अहवाल समोर आले आहेत. नवीन अभ्यासानुसार, आयफोन 17 सीरिजमधील इतर कोणत्याही मॉडेलपेक्षा सेकंड हँड मार्केटमध्ये आयफोन एअरची किंमत झपाट्याने कमी झाली आहे.
रिसेल व्हॅल्यू किती कमी झाली?
आयफोन एअर मॉडेल आणि ॲपलच्या मुख्य आयफोन 17 सीरिजमधील विक्रीत मोठी तफावत असल्याचे सेलसेल (SellCell) च्या अहवालात उघड झाले आहे. सेलसेलने सुमारे 40 ट्रेड-इन कंपन्यांच्या डेटाचे विश्लेषण केले. या विश्लेषणात असे आढळून आले की, आयफोन एअरची रिसेल व्हॅल्यू लाँच झाल्यानंतर 10 आठवड्यांच्या आत सुमारे 50 टक्क्यांनी कमी झाली. म्हणजेच, हा फोन त्याच्या मूळ किमतीच्या निम्म्या किमतीत विकला जात आहे. तुलनेत, आयफोन 17 सीरिजमधील इतर मॉडेल्स चांगली रिसेल व्हॅल्यू देत आहेत. स्टँडर्ड आयफोन 17 च्या किमतीत सुमारे 35 टक्के घट झाली आहे, तर आयफोन एअरच्या 1TB मॉडेलला सुमारे 48 टक्के कमी ट्रेड-इन किंमत मिळत आहे.
Related Articles
प्रो मॉडेल्सना मोठी मागणी
आयफोन एअरच्या उलट, 17 प्रो मॉडेल्सना जास्त मागणी कायम आहे. त्यांची रिसेल व्हॅल्यू लक्षणीयरीत्या कमी झालेली नाही. विश्लेषणातून असे दिसून आले आहे की, आयफोन 17 प्रो मॅक्सच्या 256GB मॉडेलची रिसेल व्हॅल्यू केवळ 26 टक्क्यांनी कमी झाली आहे. इतर सर्व कॉन्फिगरेशनची पुनर्विक्री किंमत जास्तीत जास्त 40 टक्क्यांनी कमी झाली आहे. तरीही, सेकंड हँड मार्केटमध्ये या मॉडेल्सना मोठी मागणी असल्याचे हे दर्शवते. सेलसेलच्या डेटानुसार, स्टँडर्ड आणि प्रो मॉडेल्स सेकंड हँड मार्केटमध्ये अधिक लोकप्रिय आहेत आणि आयफोन एअरसाठी ग्राहकांची संख्या कमी आहे.
