- Home
- lifestyle
- Alcohol And Medicines : दारू प्यायल्यावर गोळ्या घेताय? शरीराचं काय होतं, डॉक्टरांचं म्हणणं ऐका
Alcohol And Medicines : दारू प्यायल्यावर गोळ्या घेताय? शरीराचं काय होतं, डॉक्टरांचं म्हणणं ऐका
दारू प्यायल्यानंतर अनेकांना गोळ्या घेण्याची सवय असते. पण असं करणं आरोग्यासाठी खरंच सुरक्षित आहे का? दारू आणि औषधं एकत्र घेतल्यावर शरीरावर नेमका काय परिणाम होतो?
दारू आणि गोळ्या एकत्र घेतल्यावर शरीरात काय होतं?
मुंबई : आपल्या शरीरात दारू आणि बहुतांश गोळ्या पचवण्याचं काम लिव्हर करतं. तुम्ही दारू पिऊन गोळी घेता, तेव्हा लिव्हरवर प्रचंड ताण येतो. काही वेळा गोळीचा प्रभाव शरीरात गरजेपेक्षा जास्त वाढतो किंवा कमी होतो. यामुळे मळमळ, उलट्या, चक्कर येणं आणि बेशुद्ध पडण्यासारखे त्रास होतात. काही गोळ्यांसोबत दारू प्यायल्यास श्वास घ्यायला त्रास होतो, अंतर्गत रक्तस्राव आणि हृदयाच्या समस्यांचा धोका वाढतो.
पेनकिलर्स घेताना काळजी का घ्यावी?
डोकंदुखी, अंगदुखी किंवा ताप आल्यावर अनेकजण लगेच पेनकिलर घेतात. पण दारू प्यायल्यानंतर स्वतःच्या मनाने या गोळ्या घेणं अजिबात चांगलं नाही. पॅरासिटामॉलसारख्या गोळ्या दारूसोबत घेतल्या, तर लिव्हरवर खूप भयंकर ताण येतो.
डॉक्टरांचा सल्ला नक्की घ्या
ऑक्सिकोडोन (Oxycodone) सारख्या स्ट्रॉंग पेनकिलर्ससोबत दारू प्यायल्यास श्वासोच्छ्वास मंदावतो. तसेच ओव्हरडोज होण्यासारखे गंभीर धोके निर्माण होतात. त्यामुळे दारू प्यायल्यानंतर कोणतीही पेनकिलर घेण्यापूर्वी डॉक्टरांचा सल्ला घेणं केव्हाही सुरक्षित ठरतं.
बीपी, शुगरच्या गोळ्या घेणाऱ्यांनी सावधान!
बीपी किंवा मधुमेहासाठी (डायबिटीज) गोळ्या घेणाऱ्यांनी दारूच्या बाबतीत खूपच सावध राहायला हवं. दारूमुळे रक्तदाब कमी होतो. बीपीच्या गोळीसोबत दारू पोटात गेली, तर रक्तदाब अचानक कमी होऊन चक्कर येऊ शकते किंवा माणूस बेशुद्ध पडू शकतो. तसंच शुगरच्या गोळ्यांसोबत दारू प्यायल्यास रक्तातील साखरेची पातळी धोकादायक स्थितीत खाली येऊ शकते. वयस्कर लोकांमध्ये यामुळे गंभीर समस्या निर्माण होतात. त्यामुळे रोज गोळ्या घेणाऱ्यांनी दारू पिण्यापूर्वी डॉक्टरांना विचारणं बंधनकारक आहे.
दारू प्यायल्यावर गोळी घ्यायची असेल तर काय करावं?
दारू प्यायल्यानंतर डोकं दुखत असेल किंवा दुसरा कोणताही त्रास होत असेल, तर स्वतःहून गोळी घेण्याऐवजी डॉक्टर किंवा फार्मासिस्टला विचारणं सुरक्षित आहे. जे लोक आधीपासूनच एखाद्या आजारावर गोळ्या घेत आहेत, त्यांनी अधिक काळजी घ्यायला हवी. दारू नेहमी मर्यादेतच प्यावी, असा सल्ला डॉक्टर देतात. अति दारू प्यायल्याने लिव्हर खराब होतं.
टीप: वर दिलेली माहिती केवळ प्राथमिक माहिती म्हणून घ्यावी. आरोग्याच्या बाबतीत नेहमी डॉक्टरांचा सल्ला पाळणं उत्तम.
