- Home
- lifestyle
- Bathroom Smell Hacks : बाथरुमच्या दुर्गंधीवर सोपा उपाय, घरातील हा एक पदार्थ करेल कमाल
Bathroom Smell Hacks : बाथरुमच्या दुर्गंधीवर सोपा उपाय, घरातील हा एक पदार्थ करेल कमाल
पाहुणे घरी आल्यावर बाथरुममध्ये जाताना त्यांनी नाक मुरडलं, तर किती लाजिरवाणं वाटतं ना? तुमच्याही बाथरुममधून अशीच दुर्गंधी येत असेल, तर टेन्शन घेऊ नका.
बाथरुममधून घाणेरडा वास येतोय? हा घ्या सोपा उपाय
पाहुणे घरी येतात, तेव्हा तुमचं घर किती मोठं किंवा छोटं आहे, याकडे त्यांचं लक्ष नसतं. तुमचं बाथरुम किती स्वच्छ आणि नीटनेटके आहे, हे ते नक्की पाहतात. जर तुमच्या बाथरुममधून घाणेरडा वास येत असेल, तर पाहुणे पुन्हा तुमच्या घरी येण्यास टाळाटाळ करतील. त्यामुळे बाथरुम स्वच्छ आणि दुर्गंधीमुक्त ठेवणं खूप महत्त्वाचं आहे. जर तुम्हीही याच समस्येचा सामना करत असाल, तर तुम्ही अगदी योग्य बातमी वाचत आहात. बाथरुममधून वास का येतो आणि तो कसा घालवायचा, हे आपण या लेखात जाणून घेणार आहोत.
बाथरुमची दुर्गंधी घालवण्यासाठी हा एक पदार्थ पुरेसा आहे
आपण बाथरुम कितीही वेळा स्वच्छ केलं, तरी कधीकधी त्यातून घाणेरडा वास येतोच. या समस्येचं नेमकं कारण आणि उपाय अनेकांना माहीत नसतो. कारण समजलं की उपाय करणं सोपं जातं. ही दुर्गंधी कमी करण्यासाठी तुम्हाला कोणतेही महागडे प्रॉडक्ट्स आणण्याची गरज नाही. घरात सहज मिळणाऱ्या एका साध्या पदार्थाचा वापर करून तुम्ही ही दुर्गंधी सहज दूर करू शकता.
बेकिंग सोडा
बेकिंग सोडा प्रत्येकाच्या घरात सहज मिळतो आणि तो अजिबात महाग नसतो. हा पदार्थ आपण सहसा घर स्वच्छ करण्यासाठी वापरतो. बाथरुमची दुर्गंधी रोखण्यासाठीही तुम्ही बेकिंग सोडा वापरू शकता. बाथरुममधील ओलसर जागा आणि कोपऱ्यात साचलेल्या घाणीमुळे प्रामुख्याने दुर्गंधी येते. त्यात जर बाथरुममध्ये हवा खेळती नसेल, तर हा वास आणखी वाढतो. त्यामुळे बाथरुम रोज नाही, तरी वेळोवेळी स्वच्छ करणं ही एक चांगली सवय आहे. बाथरुम शक्य तितकं कोरडं ठेवा. दुर्गंधी रोखण्यासाठी हे तुमचं पहिलं पाऊल असेल.
बेकिंग सोडा खरंच बाथरुमची दुर्गंधी कमी करतो का?
घरातील दुर्गंधी कमी करण्यासाठी आपण अनेकदा बेकिंग सोडा वापरतो. याच पदार्थाचा वापर करून तुम्ही बाथरुममधील घाणेरडा वासही रोखू शकता. बेकिंग सोडा दुर्गंधी शोषून घेतो, त्यामुळे बाथरुमचा वास कमी करण्यासाठी हा एक उत्तम पर्याय आहे.
सर्वांत आधी एक डबा किंवा वाटी घ्या. त्यात थोडा बेकिंग सोडा टाकून तो बाथरुममध्ये ठेवा. पण, या सोड्याला पाणी लागणार नाही याची काळजी घ्या. तसेच, लहान मुले आणि पाळीव प्राण्यांपासून तो दूर ठेवा. बेकिंग सोडा ओलसर झाला की तो बदलून टाका. तुम्हाला तो रोज बदलण्याची गरज नाही, फक्त तो ओला झाल्यावरच बदलावा.
ज्या ठिकाणाहून वास येतोय, तिथे बेकिंग सोडा टाका
बाथरुममधील ज्या भागातून जास्त दुर्गंधी येते, तिथेही तुम्ही बेकिंग सोडा वापरू शकता. घाणेरड्या जागेवर थोडा बेकिंग सोडा टाका आणि काही मिनिटे तसाच राहू द्या. त्यानंतर ती जागा स्वच्छ धुवून काढा. पण, आरसा, काच किंवा नाजूक वस्तूंवर बेकिंग सोडा वापरणे टाळा, कारण यामुळे त्या वस्तू खराब होऊ शकतात.
ड्रेनेजच्या वासाकडे दुर्लक्ष करू नका
बहुतेक वेळा बाथरुमच्या ड्रेनेजमधूनच घाणेरडा वास येतो. तुमच्याही बाथरुममध्ये हीच समस्या असेल, तर 'उद्या स्वच्छ करू' असं म्हणून त्याकडे दुर्लक्ष करू नका. बेकिंग सोडा ड्रेनेजची घाण स्वच्छ करू शकत नाही. अशा वेळी तुम्ही ड्रेनेज आणि त्याच्या आजूबाजूचा भाग वेळोवेळी स्वच्छ केला पाहिजे. तिथे अडकलेला कचरा किंवा घाण काढून टाका. एवढं करूनही वास येतच असेल, तर पाईपलाईन किंवा ड्रेनेजमध्ये काहीतरी बिघाड असू शकतो. अशा वेळी समस्येचं मूळ शोधणं गरजेचं आहे.
बाथरुम नेहमी कोरडं ठेवा आणि हवा खेळती राहू द्या!
फक्त बेकिंग सोडा ठेवल्याने बाथरुमची दुर्गंधी पूर्णपणे जाणार नाही. बाथरुम ओले राहणार नाही आणि नेहमी कोरडे राहील, याची काळजी घ्या. टॉयलेट आणि फरशी नियमित स्वच्छ करा. आंघोळ झाल्यानंतर हवा खेळती राहण्यासाठी बाथरुमचा दरवाजा थोडा वेळ उघडा ठेवा. बाथरुम नेहमी बंद ठेवणे ही चांगली सवय नाही. बाथरुमची खिडकी नेहमी उघडी ठेवा. एक्झॉस्ट फॅनचा वापर केल्याने बाथरुम लवकर कोरडे होते आणि घाणेरडा वासही बाहेर निघून जातो.
हा उपाय सोपा आहे, पण कायमस्वरूपी नाही
बाथरुममधील रोजची दुर्गंधी कमी करण्यासाठी तुम्ही स्वच्छतेचा एक भाग म्हणून बेकिंग सोडा नक्की वापरू शकता. पण, जर खूपच भयंकर वास येत असेल, तर फक्त बेकिंग सोडा हा त्यावरचा उपाय नाही, हे लक्षात ठेवा. अशा वेळी ड्रेनेज किंवा पाईपलाईनची समस्या असू शकते.
