Egg Yolk : अंड्यातील पिवळा बलक जास्त खाल्ल्याने खरंच हार्ट अटॅकचा धोका वाढतो का?
अंडी हा एक परिपूर्ण आहार मानला जातो. यात भरपूर प्रोटीन असते. पण, अंड्यातील पिवळा बलक खाल्ल्याने हार्ट अटॅक येतो, अशी अनेकांना भीती वाटते. पिवळा बलक खाल्ल्याने खरंच कोलेस्ट्रॉल वाढतं का? चला जाणून घेऊया.
पिवळा बलक खाणं खरंच धोकादायक आहे का?
अंडी हा एक परिपूर्ण आहार आहे. यातून शरीराला जवळपास सर्वच पोषक घटक मिळतात. यात प्रोटीन भरपूर असते. पण, पिवळा बलक खाल्ल्याने बॅड कोलेस्ट्रॉल वाढते आणि हार्ट अटॅक येतो, असा अनेकांचा समज आहे. फरिदाबादच्या अमृता हॉस्पिटलमधील गॅस्ट्रोएन्टेरोलॉजिस्ट डॉ. महेंद्र सिंह राजपूत यावर महत्त्वाची माहिती देतात. आपण खाल्लेल्या अन्नातील कोलेस्ट्रॉल थेट रक्तात बॅड कोलेस्ट्रॉल म्हणून जमा होते, असा अनेकांचा गैरसमज असतो. पण हा केवळ एक गैरसमज आहे.
अंडी खाताना पिवळा भाग फेकून द्यावा का?
अंड्याच्या पिवळ्या बलकमध्ये कोलेस्ट्रॉल असते. पण हृदयविकाराचा धोका हा आपल्या खाण्याच्या सवयी, अनुवांशिक कारणे, चयापचय क्रिया आणि विशेषतः आपण खात असलेले सॅच्युरेटेड आणि ट्रान्स फॅट्स यावर अवलंबून असतो.
रोज एक अंड खाल्ल्याने हृदयविकाराचा धोका वाढत नाही, असे बीएमजे (BMJ) जर्नलमध्ये प्रसिद्ध झालेल्या एका अभ्यासात स्पष्ट झाले आहे. तरीही कोलेस्ट्रॉलकडे पूर्णपणे दुर्लक्ष करून चालणार नाही. काही लोकांमध्ये जास्त अंडी किंवा कोलेस्ट्रॉलयुक्त आहार घेतल्यास हृदयाच्या समस्या उद्भवू शकतात, असेही काही अभ्यास सांगतात.
पिवळ्या बलकमध्ये असते व्हिटॅमिन बी९
अंड्यातील एकूण प्रोटीनपैकी ४० टक्के भाग पिवळ्या बलकमध्ये असतो. उरलेला ६० टक्के भाग पांढऱ्या भागात असतो. एका पूर्ण अंड्यामध्ये आपल्या शरीराला आवश्यक असणारे सर्व अमिनो ॲसिड्स असतात. पिवळ्या बलकमध्ये व्हिटॅमिन बी९ चे नैसर्गिक रूप असलेले फोलेट असते. गर्भवती महिलांसाठी हे खूप गरजेचे असते.
पिवळा बलक फेकून दिल्यास आपण त्यातील महत्त्वाचे पोषक घटक गमावतो. डॉ. राजपूत सांगतात की, पिवळ्या बलकमध्ये उत्तम पोषक मूल्ये असतात. तो फेकून दिल्यास कोलेस्ट्रॉलसोबतच आपण पोषक घटकही गमावतो. अंडी भाज्यांसोबत खाणे खूप चांगले असते. पण चीज, बटर आणि प्रोसेस्ड मीटसोबत अंडी कधीही खाऊ नयेत.
निरोगी प्रौढ व्यक्ती रोज १ ते २ अंडी (पिवळ्या बलकासह) आरामात खाऊ शकतात. पण हृदयविकार, हाय कोलेस्ट्रॉल किंवा टाईप २ डायबिटीस असलेल्या लोकांनी अंडी कमी खावीत. ज्यांना फॅट खूप कमी करायचे आहे, त्यांनी रोज अंडी खाण्यापूर्वी डॉक्टरांचा सल्ला घेणे उत्तम.
