३० जुलै रोजी रुओ बेटावर परत न आल्याने गुआममधील यूएस कोस्ट गार्डने एका बोटीचा शोध सुरू केला. ९ जणांना घेऊन जाणाऱ्या या बोटीचा ८५,७०० चौरस किलोमीटर परिसरात १० दिवस शोध घेण्यात आला, पण सुरुवातीला ती सापडली नाही.
पॅसिफिक महासागरात तब्बल तीन महिने अडकलेल्या पाच जणांची नुकतीच सुटका करण्यात आली आहे. यात दोन लहान मुलांचाही समावेश आहे. या घटनेनंतर समुद्रातील अशाच थरारक बचाव मोहिमांची पुन्हा चर्चा सुरू झाली आहे. असोसिएटेड प्रेसच्या रिपोर्टनुसार, किरिबाटीच्या फॅनिंग बेटाजवळून गावकऱ्यांनी या लोकांना वाचवलं.
फेडरेटेड स्टेट्स ऑफ मायक्रोनेशियावरून त्यांनी प्रवास सुरू केला होता. अवघ्या २० फूट लांबीच्या छोट्या बोटीतून त्यांनी पॅसिफिक महासागरात ५,४०० किलोमीटरहून अधिक अंतर पार केलं. मायक्रोनेशियातील मुरिलो आणि रुओ बेटांदरम्यानचा हा फक्त एका तासाचा प्रवास होता. पण वाटेत भयानक वादळ आलं आणि त्यांची बोट भरकटली.
३० जुलैला ही बोट रुओ बेटावर पोहोचणं अपेक्षित होतं. पण ती न आल्याने गुआममधील यूएस कोस्ट गार्डने शोध मोहीम सुरू केली. बोटीत एकूण ९ जण होते. ८५,७०० चौरस किलोमीटर परिसरात १० दिवस शोध घेऊनही सुरुवातीला काहीच हाती लागलं नाही. आतापर्यंत ९ पैकी ५ जणांना वाचवण्यात यश आलंय, तर ४ जण अजूनही बेपत्ता आहेत.
समुद्रात इतके महिने अडकूनही जिवंत राहणं, हे खरोखरच एक आश्चर्य आहे. पण पॅसिफिक महासागरात असे अनेक महिने अडकूनही मृत्यूच्या दाढेतून परत आलेले आणखीही काही लोक आहेत. चला तर मग, समुद्रातील अशाच काही अविश्वसनीय कहाण्या जाणून घेऊया.
जोस साल्वाडोर अल्वारेन्गा: समुद्रात १३ महिने
जानेवारी २०१४ मध्ये मार्शल बेटांवरून जोस साल्वाडोर अल्वारेन्गा यांची सुटका झाली आणि ते जगभर चर्चेत आले. पॅसिफिक महासागरात ते वर्षभरापेक्षा जास्त काळ भरकटत होते. बीबीसीच्या रिपोर्टनुसार, अल्वारेन्गा यांनी फायबरग्लासच्या एका छोट्या बोटीत तब्बल १३ महिने काढले आणि ८,००० किलोमीटरचा प्रवास केला. डिसेंबर २०१२ मध्ये मेक्सिकोतून मासेमारीसाठी ते निघाले होते. पण वादळामुळे त्यांची बोट भरकटली. पावसाचं पाणी, स्वतःची लघवी आणि पक्ष्यांचं रक्त पिऊन त्यांनी जीव वाचवला. त्यांच्यासोबत असलेला इझेकिएल कॉर्डोबा हा सहकारी मात्र या संघर्षात मरण पावला.
तीन मेक्सिकन मच्छिमार: समुद्रात ९ महिने
ऑगस्ट २००६ मध्ये पॅसिफिक महासागरात ९ महिने अडकलेल्या तीन मेक्सिकन मच्छिमारांना वाचवण्यात आलं. जिझस एडुआर्डो विडाना, लुसिओ रेंडन आणि साल्वाडोर ऑर्डोनेझ अशी त्यांची नावं होती.
ऑक्टोबर २००५ मध्ये मेक्सिकोच्या सॅन ब्लास बंदरातून ते मासेमारीसाठी निघाले होते. पण जोरदार वाऱ्यामुळे त्यांची बोट किनाऱ्यापासून खूप दूर गेली. इंधन संपल्याने समुद्रात भरकटण्याशिवाय त्यांच्याकडे पर्याय नव्हता. कच्चे मासे, पक्षी खाऊन आणि पावसाचं पाणी पिऊन त्यांनी जीव वाचवला. अखेर ९ ऑगस्ट २००६ रोजी दक्षिण पॅसिफिक महासागरात तैवानच्या एका मासेमारी जहाजाने त्यांना पाहिलं आणि त्यांची सुटका केली.
लापाहेले सोपी आणि टेलिया पा: समुद्रात ४ महिने
समोआचे रहिवासी असलेले लापाहेले सोपी आणि टेलिया पा हे एका छोट्या धातूच्या बोटीत ४ महिने समुद्रात अडकले होते. २००१ मध्ये पापुआ न्यू गिनीजवळून त्यांना वाचवण्यात आलं. ते त्यांच्या देशापासून तब्बल ४,००० किलोमीटर दूर पोहोचले होते. समुद्रात मासे पकडून आणि पावसाचं पाणी साठवून त्यांनी स्वतःला जिवंत ठेवलं. पापुआ न्यू गिनीच्या मिल्ने बे मधील एका गावकऱ्याने त्यांना पाहिलं. त्यांच्याकडे असलेल्या शेवटच्या फ्लेअरचा वापर करून त्यांनी मदत मागितली. त्यानंतर त्या गावकऱ्याने होडी घेऊन दोघांनाही वाचवलं.
मॉरिस आणि मर्लिन बेली: पॅसिफिक महासागरात ११७ दिवस
१९७३ मध्ये मॉरिस आणि मर्लिन बेली या ब्रिटिश जोडप्याने पॅसिफिक महासागरात ११७ दिवस (सुमारे ४ महिने) काढले. ग्वाटेमालाच्या किनाऱ्याजवळ एका देवमाशाने त्यांच्या बोटीला धडक दिल्याने हा अपघात झाला. बोट बुडाल्यावर दोघांनी रबराच्या छोट्या होडीत आश्रय घेतला. सुमारे चार महिने समुद्रात भरकटल्यानंतर अखेर त्यांना वाचवण्यात आलं.
जगण्याच्या आणखी काही थरारक कहाण्या
गिनीज वर्ल्ड रेकॉर्डनुसार, जपानी कॅप्टन ओगुरी जुकिची आणि त्यांचा एक खलाशी १८१३ ते १८१५ दरम्यान तब्बल ४८४ दिवस समुद्रात जिवंत राहिले. समुद्रातील हा सर्वात मोठा जगण्याचा संघर्ष मानला जातो.
१९८२ मध्ये अमेरिकन खलाशी डेबोरा स्केलिंग किली आणि आणखी एका क्रू मेंबरने वादळात बोट बुडाल्यावर लाईफ राफ्टमध्ये ५ दिवस काढले. अमेरिकेच्या किनाऱ्यापासून दूर हा अपघात झाला होता. त्यांच्या या भयानक अनुभवावर आधारित 'टू केम बॅक' हा चित्रपट नंतर तयार करण्यात आला.
१९८२ मध्ये अमेरिकन साहसी प्रवासी स्टीव्हन कॅलाहान यांनी अटलांटिक महासागरात एका लाईफ राफ्टमध्ये ७६ दिवस एकट्याने काढले. एका देवमाशाने धडक दिल्याने त्यांचं जहाज बुडालं होतं. समुद्रात मासे पकडून आणि पावसाचं पाणी साठवून त्यांनी आपला जीव वाचवला.
