Siddaramaiah Resign : काँग्रेस हायकमांडने कर्नाटकात नेतृत्वबदलाचा निर्णय घेतला असून सिद्धरामय्या यांनी मुख्यमंत्रीपदाचा राजीनामा दिला आहे. डीके शिवकुमार यांच्याकडे मुख्यमंत्रीपदाची जबाबदारी सोपवली जाणार आहे. 2023 मध्ये सत्तेत आल्यानंतर झालेल्या कथित पॉवर-शेअरिंग करारानुसार हा निर्णय झाल्याचे सांगितले जात आहे.
Siddaramaiah Resign : कर्नाटकाच्या राजकारणात मोठी घडामोड घडली असून मुख्यमंत्री सिद्धरामय्या यांनी गुरुवारी आपल्या पदाचा राजीनामा दिला. काँग्रेस हायकमांडच्या निर्देशानुसार त्यांनी राज्यपाल थेवर चंद गेहलोत (Thawar Chand Gehlot) यांच्या कार्यालयाकडे राजीनामा सुपूर्द केला. आता विद्यमान उपमुख्यमंत्री डी. के. शिवकुमार (DK Shivakumar) कर्नाटकचे नवे मुख्यमंत्री होणार असल्याची माहिती समोर आली आहे.
दिल्लीतील बैठकीत झाला निर्णय
26 मे रोजी नवी दिल्लीमध्ये काँग्रेस अध्यक्ष मल्लिकार्जुन खर्गे, विरोधी पक्षनेते राहुल गांधी, सिद्धरामय्या, डीके शिवकुमार आणि काँग्रेस सरचिटणीस केसी वेणूगोपाळ यांच्या उपस्थितीत महत्त्वाची बैठक पार पडली. या बैठकीत हायकमांडने नेतृत्वबदलाचा निर्णय स्पष्टपणे कळविल्याचे समजते. यानंतर गुरुवारी सकाळी सिद्धरामय्या यांनी आपल्या मंत्रिमंडळातील सहकाऱ्यांसोबत नाश्त्याची बैठक घेतली आणि आपण पद सोडणार असल्याची माहिती दिली.
Related Articles
पॉवर-शेअरिंग फॉर्म्युल्याची चर्चा पुन्हा चर्चेत
2023 मध्ये काँग्रेस सत्तेत आल्यानंतर मुख्यमंत्रीपदावरून सिद्धरामय्या आणि डीके शिवकुमार यांच्यात पॉवर-शेअरिंगचा करार झाल्याची चर्चा होती. गेल्या काही महिन्यांपासून नेतृत्वबदलाच्या चर्चांना उधाण आले होते. सोशल मीडियावरील सूचक पोस्ट, दिल्ली दौरे आणि दोन्ही गटातील नेत्यांच्या वक्तव्यांमुळे या चर्चांना अधिक हवा मिळाली. शिवकुमार यांनी काही महिन्यांपूर्वी “Word power is world power” अशी पोस्ट केली होती. त्यावर सिद्धरामय्या यांनी अप्रत्यक्ष टोला लगावत “शब्द तेव्हाच शक्तिशाली ठरतो जेव्हा तो जनतेच्या भल्यासाठी वापरला जातो,” असे म्हटले होते.
सिद्धरामय्या यांचा राजकीय प्रवास
3 ऑगस्ट 1948 रोजी म्हैसूर जिल्ह्यातील सिद्धरामनहुंडी येथे जन्मलेल्या सिद्धरामय्या यांनी अत्यंत सामान्य कुटुंबातून राजकारणात प्रवेश केला. त्यांनी बीएससी आणि कायद्याचे शिक्षण पूर्ण केले आणि काही काळ वकिलीही केली. कुरुबा समाजातून आलेले सिद्धरामय्या हे सामाजिक न्यायाच्या राजकारणासाठी ओळखले जातात. 1983 मध्ये लोकदलच्या तिकिटावरून त्यांनी पहिल्यांदा विधानसभा निवडणूक जिंकली. त्यानंतर जनता पक्ष आणि जनता दलमध्ये विविध जबाबदाऱ्या सांभाळत त्यांनी वित्त, पशुसंवर्धन आणि उपमुख्यमंत्रीपदासह अनेक महत्त्वाची पदे भूषवली.
AHINDA राजकारणामुळे वेगळी ओळख
अल्पसंख्याक, मागासवर्गीय आणि दलित समाजाला एकत्र आणणाऱ्या AHINDA राजकारणामुळे सिद्धरामय्या यांनी कर्नाटकात स्वतंत्र राजकीय ओळख निर्माण केली. JD(S) मधून बाहेर पडल्यानंतर त्यांनी काँग्रेसमध्ये प्रवेश केला. 2013 मध्ये त्यांच्या नेतृत्वाखाली काँग्रेसने मोठा विजय मिळवला आणि ते मुख्यमंत्री बनले. त्यांचा 2013 ते 2018 हा कार्यकाळ विशेष गाजला. तब्बल 40 वर्षांनंतर पाच वर्षांचा पूर्ण कार्यकाळ पूर्ण करणारे ते पहिले मुख्यमंत्री ठरले. वित्तमंत्री म्हणून त्यांनी विक्रमी 17 वेळा राज्याचा अर्थसंकल्प सादर केला.
दुसऱ्या कार्यकाळातील महत्त्वाचे निर्णय
2023 मध्ये पुन्हा मुख्यमंत्री झाल्यानंतर सिद्धरामय्या सरकारने काँग्रेसच्या पाच प्रमुख हमी योजना लागू केल्या. यामध्ये महिलांसाठी आर्थिक मदत, मोफत वीज, अतिरिक्त धान्य, महिलांसाठी मोफत बस प्रवास आणि बेरोजगार तरुणांसाठी आर्थिक सहाय्य अशा योजनांचा समावेश होता.तसेच VIP वाहतुकीसाठी लागू असलेला ‘झिरो ट्रॅफिक’ प्रोटोकॉल मागे घेण्याचा निर्णयही त्यांनी घेतला. शैक्षणिक संस्थांमधील हिजाबबंदीवरील निर्बंध शिथिल करण्याचाही निर्णय त्यांच्या सरकारने घेतला होता.
काँग्रेससमोर आता नवे आव्हान
सिद्धरामय्या यांच्या राजीनाम्यानंतर आता डीके शिवकुमार यांच्या नेतृत्वाखाली काँग्रेस सरकार पुढे जाणार आहे. मात्र या नेतृत्वबदलानंतर पक्षातील अंतर्गत समतोल राखणे आणि आगामी निवडणुकांपूर्वी जनतेचा विश्वास कायम ठेवणे, हे काँग्रेससमोर मोठे आव्हान असणार आहे.
