आम आदमी पार्टीने भाजपवर दिल्ली निवडणुकीत मतखरेदीचा गंभीर आरोप केला आहे. संजय सिंह यांनी पत्रकार परिषदेत दावा केला की भाजप नेत्यांनी मतांसाठी ११०० रुपये वाटले आणि ९००० रुपये स्वतः ठेवले.
दिल्ली विधानसभा निवडणूक ५ फेब्रुवारी रोजी होणार आहे. आम आदमी पार्टीचे नेते संजय सिंह आणि सौरभ भारद्वाज यांनी एक पत्रकार परिषद घेऊन भाजपवर जोरदार टीका केली आहे. त्यांनी पक्षाच्या काही नेत्यांवर दिल्लीत ११०० रुपये मतखरेदीसाठी वाटल्याचा आरोप केला आहे. तसेच सध्या दिल्लीच्या कानाकोपऱ्यात याची चर्चा सुरू असल्याचे सांगितले. भाजपकडून उघडपणे पैसे देऊन मतखरेदीचा प्रयत्न केला जात आहे.
पत्रकार परिषदेत बोलताना संजय सिंह म्हणाले की, आम्हाला सूत्रांकडून मिळालेली माहिती अतिशय गंभीर आहे. भाजप नेत्यांनी १०-१० हजार रुपये वाटप करण्यासाठी आपल्या कार्यकर्त्यांना दिले आहेत. पैसे वाटा आणि मते खरेदी करा. त्यांच्या नेत्यांनी विचार केला की निवडणूक तरी हारायचीच आहे तर निवडणुकीत पैसे कमवा. त्यानंतर त्यांनी एक नवीन पद्धत अवलंबली. ९ हजार रुपये खिशात ठेवा आणि ११०० रुपये वाटा. अशाप्रकारे संपूर्ण दिल्लीत १-१ हजार रुपये वाटले गेले. ९ हजार रुपये वाचवले. मी भाजपला हा प्रश्न विचारू इच्छितो की, याची सत्यता सर्वांसमोर आणा. जर तुम्हाला १० हजार रुपये दिले असतील तर तुम्ही सर्व पैसे का वाटले नाहीत? ९ हजार रुपये का खिशात टाकले?
दिल्लीची जनता भाजपला प्रश्न विचारेल: संजय सिंह
याशिवाय संजय सिंह म्हणाले की, जर हे तुमच्याकडे मत मागायला आले तर त्यांना विचारा की तुमच्या नेत्यांनी पाठवलेले १० हजार रुपयांपैकी ९ हजार रुपये कुठे आहेत? दिल्लीच्या लोकांना त्यांचा भ्रष्टाचार उघड करायचा आहे. यापूर्वी संजय सिंह पंतप्रधान नरेंद्र मोदी यांच्या निवासस्थानावरून भाजप आणि पंतप्रधानांवर टीका करताना दिसले होते. यासाठी त्यांनी निदर्शनेही केली होती.
