नोएडामध्ये फॉर्च्युनरवर स्टंट, ३३,००० रुपयांचा दंड

गर्दीच्या रस्त्यावर धोकादायक स्टंट केल्याप्रकरणी पोलिसांनी कारवाई केली आहे. उत्तर प्रदेशातील नोएडातील सेक्टर १२६ मध्ये ही घटना घडली. टोयोटा फॉर्च्युनर एसयूव्हीच्या बोनटवर बसून स्टंट केल्याबद्दल ही कारवाई करण्यात आली आहे. फॉर्च्युनर कारमध्ये धोकादायक स्टंट केल्याबद्दल नोएडा ट्रॅफिक पोलिसांनी ३३,००० रुपयांचा दंड आकारला आहे. धोकादायक कृत्य दाखवणारा व्हिडिओ सोशल मीडियावर व्हायरल झाल्यानंतर पोलिसांनी ही कारवाई केली.

नोएडातील सेक्टर-१२६ मधील हा व्हिडिओ आहे. स्टंट करणाऱ्या युवकांचा शोध सुरू असल्याचे पोलिसांनी सांगितले. २८ सेकंदांच्या या व्हिडिओमध्ये एक युवक कारच्या बोनटवर बसलेला आणि इतर दोन युवक कारच्या खिडक्यांना लटकून रील बनवत असल्याचे दिसत आहे. कारचे सर्व दिवे चालू आहेत. कारमध्ये बसलेला चालक रस्त्यावर गाडी फिरवत आहे. या घटनेत कोणीही जखमी झाले नसले तरी, ट्रॅफिक नियमांचे उल्लंघन, धोकादायक ड्रायव्हिंग रेसिंग, कायदेशीर परवानगीशिवाय जास्त वेगाने गाडी चालवणे, सुरक्षा पट्टा न वापरणे आणि इतर बाबी लक्षात घेऊन पोलिसांनी कारवाई केली.

हा व्हिडिओ सोशल मीडियावर लगेचच व्हायरल झाला. यानंतर, पोलिसांना टॅग करून स्टंट करणाऱ्या युवकांवर कारवाई करण्याची मागणी अनेकांनी केली. व्हिडिओ पाहिल्यानंतर पोलिसांनी कारवाई केली. युवकांच्या या कृत्यामुळे त्यांनी केवळ स्वतःचा जीव धोक्यात घातला नाही तर त्यांच्या धोकादायक कृत्यामुळे सर्वसामान्यांचाही जीव धोक्यात आला. सेक्टर १२६ पोलीस ठाण्याच्या हद्दीतील खाजगी विद्यापीठाच्या परिसरात कारमध्ये स्टंट करणाऱ्या युवकांचा व्हिडिओ यापूर्वीही व्हायरल झाला होता.