गुवाहाटी - ओखा द्वारका एक्सप्रेसमध्ये एका प्रवाशाला दिलेल्या डाळीत लोखंडी तारेचा तुकडा सापडला. या घटनेनंतर IRCTC ने केटरिंग कंत्राटदाराला दंड ठोठावला आणि कर्मचाऱ्यांना कामावरून काढून टाकले. प्रवाशाने पैसे किंवा दुसरे अन्न घेण्यास नकार देत थेट तक्रार केली.
नवी दिल्ली : गुवाहाटी - ओखा द्वारका एक्सप्रेसमध्ये एका प्रवाशाला दिलेल्या डाळीत लोखंडी तारेचा तुकडा सापडला. या घटनेनंतर इंडियन रेल्वे केटरिंग अँड टुरिझम कॉर्पोरेशन (IRCTC) ने केटरिंग कंत्राटदारावर कडक कारवाई केली आहे. अधिकाऱ्यांनी सांगितले की कंत्राटदाराला दंड ठोठावण्यात आला असून या घटनेत सामील असलेल्या कर्मचाऱ्यांना नोकरीवरून काढून टाकण्यात आले आहे.
डाळीत सापडला लोखंडी तुकडा
अमित अवस्थी नावाच्या प्रवाशाला त्याच्या जेवणात हा लोखंडी तुकडा सापडला. त्याने या घटनेचा व्हिडिओ X (पूर्वीचे ट्विटर) वर शेअर केला आहे. व्हिडिओमध्ये त्याने सांगितले की अर्धे जेवण झाल्यावर त्याला डाळीत लोखंडाचा तुकडा दिसला. तो तुकडा चांदीच्या रंगाचा होता, आणि चुकून तो पोटात गेला असेल का, अशी भीती त्याने व्हिडिओमध्ये व्यक्त केली आहे.
कर्मचाऱ्यांनी सांगितले की हा तुकडा भांडी घासण्यासाठी वापरल्या जाणाऱ्या स्क्रबरचा भाग असू शकतो. या घटनेच्या दुसऱ्या एका व्हिडिओमध्ये, ट्रेनमधील केटरिंग कर्मचारी कबूल करताना दिसतो की भांडी घासताना स्क्रबरचा तुकडा जेवणात पडला असावा. असे स्क्रबर सहसा स्टेनलेस स्टीलचे बनलेले असतात.
पैसे नको, अन्न नको, प्रवाशाने केली तक्रार
कर्मचाऱ्याने प्रवाशाला दुसरे जेवण देण्याची तयारी दर्शवली. त्याने वारंवार माफी मागितली आणि पैसे परत देण्याची ऑफरही दिली. मात्र, प्रवाशाने नवीन अन्न किंवा पैसे घेण्यास स्पष्ट नकार दिला. त्याऐवजी तो थेट रेल्वेकडे तक्रार करण्यावर ठाम राहिला. जेवणातील लोखंडी तुकड्याचा व्हिडिओ प्रवाशाने X वर शेअर केल्यानंतर, IRCTC च्या अधिकृत खात्यावरून यावर प्रतिक्रिया आली. या घटनेची गंभीर दखल घेतली असून संबंधितांवर कारवाई करण्यात आल्याचे IRCTC ने स्पष्ट केले. मात्र, केटरिंग कंत्राटदाराला नेमका किती दंड ठोठावला हे IRCTC ने उघड केलेले नाही.
