गुजरातच्या जुनागढमध्ये एका आश्रमाबाहेर बिबट्याने एका कुत्र्याची शिकार केली. धक्कादायक म्हणजे, यावेळी काही लोक तिथेच बसून मोबाईल पाहत होते. हा थरार सीसीटीव्हीमध्ये कैद झाला आहे.
गुजरातच्या जुनागढमध्ये एक धक्कादायक घटना घडली आहे. गिरनार जंगलाजवळ असलेल्या प्रेरणधाम आश्रमाबाहेर एका बिबट्याने कुत्र्यावर हल्ला करून त्याला उचलून नेले. विशेष म्हणजे, यावेळी काही लोक तिथून अवघ्या काही अंतरावर बसले होते, पण त्यांना या धोक्याची भणकही लागली नाही. हा सगळा थरार सीसीटीव्ही कॅमेऱ्यात कैद झाला आहे.
सीसीटीव्ही फुटेजमध्ये स्पष्ट दिसते की, आश्रमाच्या प्रवेशद्वाराजवळ असलेल्या ऑफिसकडे बिबट्या दबक्या पावलांनी येतो. तिथेच एक कुत्रा दरवाजाजवळ उभा होता. काही कळायच्या आतच बिबट्याने कुत्र्याच्या मानेवर झडप घातली आणि क्षणात त्याला जंगलाच्या दिशेने ओढत नेले.
या घटनेतील सर्वात भयंकर बाब म्हणजे, हल्ला झाला तेव्हा लोक अगदी जवळच होते. जवळच्याच एका बाकावर तीन जण बसले होते आणि ते आपापल्या मोबाईलमध्ये मग्न होते. आजूबाजूचे काही लोक गप्पा मारण्यात व्यस्त होते. बिबट्या इतक्या वेगाने आला आणि गेला की कोणालाच काही समजले नाही किंवा प्रतिक्रिया द्यायला वेळच मिळाला नाही.
आश्रमाची देखभाल करणारे राजभाई यांनी सांगितले की, ही घटना काल संध्याकाळी साडेसातच्या सुमारास घडली. सुरुवातीला तिथे उपस्थित असलेल्या लोकांना नक्की काय झाले हेच समजले नाही. जेव्हा सीसीटीव्ही फुटेज तपासले, तेव्हा बिबट्याने अचानक केलेल्या या हल्ल्याचा उलगडा झाला.
प्रेरणधाम आश्रम हे गिरनार जंगलाला लागूनच आहे. या भागात अनेकदा सिंह आणि बिबट्यांचा वावर पाहायला मिळतो. विशेषतः रात्री उशिरा किंवा पहाटेच्या वेळी हे वन्यजीव इकडे फिरकतात.
पण, संध्याकाळच्या वेळी लोक बाहेर बसलेले असतानाच बिबट्या आल्याने आश्रमात राहणाऱ्या लोकांमध्ये भीतीचे वातावरण आहे. या घटनेमुळे परिसरातील निवासी आणि धार्मिक स्थळांच्या आजूबाजूला वन्यजीवांच्या वाढत्या वावराबाबत चिंता व्यक्त केली जात आहे.
