काँग्रेस अध्यक्ष मल्लिकार्जुन खर्गे यांनी भाषण दिलेलं स्टेज 'शुद्ध' केल्याप्रकरणी अखेर गुन्हा दाखल झाला आहे. दलित खासदारांनी दिल्लीतील पोलीस स्टेशनमध्ये अनेक तास आंदोलन केल्यानंतर उत्तराखंड पोलिसांनी SC/ST कायद्याअंतर्गत ही कारवाई केली.
नवी दिल्ली: काँग्रेस अध्यक्ष मल्लिकार्जुन खर्गे यांच्यासोबत झालेल्या जातीय भेदभावाच्या प्रकरणानंतर दलित खासदारांनी जोरदार आंदोलन केलं. या आंदोलनानंतर अखेर पोलिसांनी गुन्हा दाखल केला आहे. दिल्लीतील पार्लमेंट स्ट्रीट पोलीस स्टेशनमध्ये तब्बल साडेतीन तास आंदोलन केल्यानंतर, ज्या ठिकाणी ही घटना घडली त्या उत्तराखंडमध्ये गुन्हा नोंदवण्यात आला. या खासदारांनी राष्ट्रपतींची भेट घेऊन या प्रकरणात हस्तक्षेप करण्याची मागणी करण्याचा प्रयत्न केला होता, पण त्यांना भेटीची वेळ मिळाली नाही.
मल्लिकार्जुन खर्गे भाषण देऊन गेल्यानंतर स्टेज 'शुद्ध' करण्याच्या घटनेवरून काँग्रेसच्या दलित खासदारांनी आक्रमक पवित्रा घेतला. या प्रकरणाचा तपास संथ गतीने सुरू असल्याचा आरोप करत, तातडीने कारवाई व्हावी यासाठी राष्ट्रपतींना भेटून निवेदन देण्याची त्यांची योजना होती. मात्र, दुपारी दोन वाजेपर्यंत राष्ट्रपतींकडून भेटीसाठी वेळ मिळाली नाही. अखेर, दुपारी साडेतीनच्या सुमारास १५ खासदार पार्लमेंट स्ट्रीट पोलीस स्टेशनमध्ये पोहोचले. पोलिसांनी तक्रार स्वीकारली, पण गुन्हा दाखल करण्यास ते तयार नव्हते. तब्बल साडेतीन तासांच्या आंदोलनानंतर उत्तराखंडमधील नैनितालमध्ये गुन्हा दाखल करण्यात आला. खर्गे यांच्यासोबत जातीय भेदभावाची घटना घडलेल्या हल्द्वानी पोलीस स्टेशनच्या हद्दीत गुन्हा नोंदवल्याची माहिती मिळाल्यानंतर खासदारांनी आपलं आंदोलन मागे घेतलं.
खर्गे भाषण देऊन गेल्यानंतर स्टेजचं शुद्धीकरण करणाऱ्या श्रीराम धर्मार्थ सेवा न्यासचे अध्यक्ष गिरीश चंद्र पांडे यांच्यासह १५ जणांवर गुन्हा दाखल करावा, अशी खासदारांची मागणी आहे. मिळालेल्या माहितीनुसार, उत्तराखंडमध्ये अनुसूचित जाती आणि अनुसूचित जमाती (अत्याचार प्रतिबंधक) कायद्यानुसार (SC/ST Act) हा गुन्हा दाखल करण्यात आला आहे. शुद्धीकरण करणाऱ्यांवर कारवाई केली जाईल, असं आश्वासन मंत्री जे. पी. नड्डा यांनी संसदेत दिलं होतं. पण कोणतीही कारवाई न झाल्याने काँग्रेसने आपली भूमिका अधिक तीव्र केली. याआधी उत्तराखंड आणि बंगळुरूमध्ये दोन गुन्हे दाखल झाले होते, पण अद्याप कोणालाही अटक झालेली नाही.
