कर्नाटकच्या नूतन राज्यपाल डॉ. सुधा यादव यांनी पदभार स्वीकारल्याच्या पहिल्याच दिवशी शारदा मातेचं दर्शन घेतलं. त्यांनी मंत्री के. जे. जॉर्ज यांच्यासोबत श्री शारदा मंदिराला भेट देऊन आशीर्वाद घेतले.
बंगळुरू (१७ ऑक्टोबर): कर्नाटकच्या नूतन राज्यपाल म्हणून पदभार स्वीकारल्याच्या पहिल्याच दिवशी डॉ. सुधा यादव यांनी श्री शारदा मंदिराला भेट दिली. त्यांनी ऊर्जा आणि पर्यटन मंत्री के. जे. जॉर्ज यांच्यासोबत संध्याकाळी शहरातील श्री सुरभारती संस्कृत आणि सांस्कृतिक प्रतिष्ठानच्या मंदिरात जाऊन दर्शन घेतलं. सर्वज्ञ नगर विधानसभा मतदारसंघातील या श्री सुरभारती क्षेत्रात मंत्री जॉर्ज यांनी राज्यपालांचं अगदी मनापासून स्वागत केलं. प्रतिष्ठानमधील पूजेचे सर्व विधी पूर्ण होईपर्यंत ते राज्यपालांसोबत उपस्थित होते.
नवरात्रोत्सवाच्या सहाव्या दिवसाचं औचित्य साधून वीणापाणी श्री शारदा मातेची विशेष सजावट करण्यात आली होती. यावेळी वेद मंत्रांच्या गजरात लक्ष कुंकुमार्चन सोहळाही पार पडला. या धार्मिक कार्यक्रमात राज्यपाल आणि मंत्री दोघेही सहभागी झाले होते. लोकभवनमध्ये शपथविधी पार पडल्यानंतर आणि अधिकृतपणे पदभार स्वीकारल्यानंतर डॉ. सुधा यादव यांनी मान्यवरांच्या शुभेच्छा स्वीकारल्या. त्यानंतर त्यांनी थेट श्री शारदांबेच्या दरबारात जाऊन आशीर्वाद घेतले. दर्शन घेतल्यानंतर त्यांनी तिथे मांडलेल्या विशेष बाहुल्यांच्या प्रदर्शनाचीही पाहणी केली.
कुटुंबीयांसोबत डॉ. सुधा यादव यांची मंदिरात उपस्थिती
याप्रसंगी श्री सुरभारती प्रतिष्ठानचे विश्वस्त नागराज, निवृत्त आयपीएस अधिकारी राममूर्ती आणि इतर अनेक मान्यवर उपस्थित होते.
केंद्र सरकारने नुकतीच काही राज्यांच्या नवीन राज्यपालांची नियुक्ती केली आहे. कर्नाटकचे माजी राज्यपाल थावरचंद गेहलोत यांच्या जागी डॉ. सुधा यादव यांची नियुक्ती करण्यात आली. नुकताच लोकभवनमध्ये थावरचंद गेहलोत यांना भावपूर्ण निरोप देण्यात आला. त्यानंतर आता डॉ. सुधा यादव यांनी कर्नाटकच्या नव्या राज्यपाल म्हणून आपला कार्यभार अधिकृतपणे हाती घेतला आहे.
