इन्फोसिसचे सह-संस्थापक क्रिस गोपालकृष्णन यांच्यासह १८ जणांवर अनुसूचित जाती-जमाती अत्याचार प्रतिबंधक कायद्याअंतर्गत गुन्हा दाखल करण्यात आला आहे.
बेंगळुरू: इन्फोसिसचे सह-संस्थापक क्रिस गोपालकृष्णन यांच्यासह १८ जणांवर पोलिसांनी गुन्हा दाखल केला आहे. हा गुन्हा अनुसूचित जाती-जमाती अत्याचार प्रतिबंधक कायद्याअंतर्गत दाखल करण्यात आला आहे. बेंगळुरू सदाशिव नगर पोलिसांनी क्रिस गोपालकृष्णन यांच्यासह इतर १७ जणांवर अॅट्रॉसिटी कायद्याअंतर्गत गुन्हा दाखल केला आहे. इंडियन इन्स्टिट्यूट ऑफ सायन्समधील माजी कर्मचारी आणि आदिवासी बोवी समाजातील दुर्गप्पा या तरुणाच्या तक्रारीवरून ही कारवाई करण्यात आली आहे.
२०१४ मध्ये हनीट्रॅप प्रकरणात या कर्मचाऱ्याला नोकरीवरून काढून टाकण्यात आले होते. स्वतःवर लादण्यात आलेला हनीट्रॅपचा आरोप खोटा असल्याचे सांगत त्यांनी क्रिस गोपालकृष्णन यांच्याकडे मदत मागितली होती, जेव्हा ते आईआईएससी बोर्ड ऑफ ट्रस्टीचे सदस्य होते. मात्र त्यांनी मदत केली नाही, असा आरोप तक्रारीत करण्यात आला आहे. जातीय दुर्व्यवहार आणि धमक्या दिल्या जात असल्याची तक्रार करूनही त्यावर कोणतीही कारवाई झाली नाही, असेही तक्रारीत म्हटले आहे. स्वतःला खोट्या हनीट्रॅप प्रकरणात अडकवून नोकरीवरून काढून टाकल्याचा आरोप तक्रारीत करण्यात आला आहे. सिव्हिल अँड सेशन्स कोर्टाच्या निर्देशानुसार सदाशिव नगर पोलिसांनी हा गुन्हा दाखल केला आहे.
