India Pakistan Ceasefire : शनिवारी झालेल्या युद्धबंदी कराराच्या अवघ्या तीन तासांनंतर पाकिस्तानने त्याचे उल्लंघन केले. सध्या सीमेवरील परिस्थिती नियंत्रणात आहे आणि सुरक्षा दल पूर्णपणे सतर्क आहेत.
India Pakistan Ceasefire : शनिवारी (10 मे) झालेल्या करारानंतर अवघ्या तीन तासांतच पाकिस्तानकडून त्याचे उल्लंघन झाले. रात्री साडेआठच्या सुमारास पाकिस्तानी ड्रोन जम्मू-काश्मीरपासून पंजाब, राजस्थान आणि गुजरातपर्यंत दिसले, त्यानंतर ड्रोन हल्ल्याच्या बातम्या आल्या. युद्धबंदी असतानाही पाकिस्तानचा हा हल्ला नियमांच्या विरोधात होता. त्याला प्रत्युत्तर म्हणून केंद्र सरकारच्या निर्देशानुसार भारतीय सैन्याने कडक कारवाई केली आणि पाकिस्तान शांत झाला. सध्या सीमेवर सुरक्षा दल पूर्णपणे सतर्क आहेत.
रेड अलर्ट जारी
सध्या जम्मू शहरात परिस्थिती सामान्य आहे. १० आणि ११ मेच्या रात्री दरम्यान कोणताही ड्रोन दिसला नाही किंवा गोळीबार झाल्याच्या बातम्या नाहीत. पुंछमध्येही रात्र शांततेत गेली आणि परिस्थिती सामान्य राहिली. भारत-पाकिस्तानमधील वाढत्या तणावाच्या पार्श्वभूमीवर अमृतसरच्या जिल्हाधिकारी यांनी रेड अलर्ट जारी केला आहे. लोकांना घरातच राहण्यास आणि खिडक्यांपासून दूर राहण्यास सांगण्यात आले आहे जेणेकरून कोणत्याही आपत्कालीन परिस्थितीत ते सुरक्षित राहतील.
भारतीय सैन्याला प्रत्युत्तराचे आदेश
विदेश सचिव विक्रम मिस्री यांनी एका विशेष पत्रकार परिषदेत सांगितले की, आज सकाळी भारत आणि पाकिस्तानच्या लष्करी अधिकाऱ्यांमध्ये झालेल्या कराराचे हे उल्लंघन आहे आणि भारत या घटनांना अत्यंत गांभीर्याने घेत आहे. भारतने पाकिस्तानला आवाहन केले आहे की, हे उल्लंघन थांबवण्यासाठी आवश्यक पावले उचलावीत आणि पूर्ण गांभीर्याने आणि जबाबदारीने परिस्थितीचा सामना करावा. मिस्री म्हणाले की, भारतीय सशस्त्र दलांना कडक सूचना देण्यात आल्या आहेत की, आंतरराष्ट्रीय सीमा आणि नियंत्रण रेषेवर कोणत्याही प्रकारच्या उल्लंघनाला कडक प्रत्युत्तर द्यावे.
Related Articles
ते म्हणाले, “गेल्या काही तासांपासून पाकिस्तान सतत कराराचे उल्लंघन करत आहे, जो आज संध्याकाळी डीजीएमओमध्ये झाला होता. आमचे सैन्य या कृत्यांना चोख प्रत्युत्तर देत आहे आणि आम्ही ही उल्लंघने गांभीर्याने घेत आहोत.”
