देशावर इंधन संकट? पेट्रोल पंपांवरील गर्दीनंतर सरकारी कंपनीने अखेर सत्य सांगितलं; अफवांवर विश्वास ठेवू नका!

India fuel crisis rumors: सोशल मीडियावर पसरलेल्या इंधन टंचाईच्या अफवांमुळे पेट्रोल पंपांवर गर्दी वाढली. या पार्श्वभूमीवर भारत पेट्रोलियमने (BPCL) स्पष्ट केले आहे की देशात इंधनाचा पुरेसा साठा असून पुरवठा साखळी सुरळीत आहे आणि नागरिकांनी घाबरून जाऊ नये.

Image Credit : X

देशावर इंधन संकट? पेट्रोल पंपांवरील गर्दीनंतर सरकारी कंपनीने अखेर सत्य सांगितलं

नवी दिल्ली: गेल्या काही दिवसांपासून आखाती देशांमधील युद्धजन्य परिस्थितीमुळे भारतात इंधन टंचाई निर्माण होणार असल्याच्या चर्चा सोशल मीडियावर रंगल्या आहेत. एलपीजी गॅसपाठोपाठ आता पेट्रोल-डिझेलचाही तुटवडा भासणार, या भीतीने अनेक शहरांतील पेट्रोल पंपांवर ग्राहकांच्या लांबच लांब रांगा लागल्याचे पाहायला मिळाले. मात्र, या वाढत्या अफवांना आता पूर्णविराम मिळाला असून सरकारी तेल कंपनीने मोठी घोषणा केली आहे. 

Image Credit : X

काय म्हणतेय भारत पेट्रोलियम (BPCL)?

वाढत्या गोंधळाच्या पार्श्वभूमीवर भारत पेट्रोलियम कॉर्पोरेशन लिमिटेडने (BPCL) अधिकृत स्पष्टीकरण जारी केले आहे. कंपनीने म्हटले आहे की,

पुरवठा सुरळीत: देशभरातील इंधन पुरवठा साखळी (Supply Chain) पूर्णपणे सुरक्षित आणि सुरळीत आहे. कोणत्याही राज्यात किंवा शहरात इंधनाचा तुटवडा नाही.

उत्पादन सुरू: देशात पूर्ण क्षमतेने तेल उत्पादन आणि वितरण सुरू असून, भविष्यातही यात कोणताही अडथळा येणार नाही.

निर्यातदार देश: भारत सध्या पेट्रोल आणि डिझेलचा निव्वळ निर्यातदार (Net Exporter) देश आहे. म्हणजेच आपल्याकडे स्वतःची गरज भागवून दुसऱ्या देशांना इंधन देण्याइतका साठा उपलब्ध आहे. 

Image Credit : ChaGPT

अफवांकडे दुर्लक्ष करण्याचे आवाहन

बीपीसीएलने सोशल मीडिया प्लॅटफॉर्म 'X' (ट्विटर) वर पोस्ट करून नागरिकांना घाबरून न जाण्याचे आवाहन केले आहे. "इंधन संपणार असल्याच्या बातम्या पूर्णपणे निराधार आहेत. नागरिक विनाकारण पेट्रोल पंपावर गर्दी करून स्वतःचा वेळ वाया घालवत आहेत. सप्लाय चेनमध्ये कोणतीही बाधा आलेली नाही," असे कंपनीने स्पष्ट केले आहे. 

Image Credit : X

सर्वसामान्यांसाठी महत्त्वाचे

१. देशात हवाई इंधन (ATF), पेट्रोल आणि डिझेलचा मुबलक साठा आहे.

२. आखाती देशांमधील तणावाचा सध्या भारतीय इंधन उपलब्धतेवर कोणताही परिणाम झालेला नाही.

३. विनाकारण इंधन साठवणूक करण्याचा प्रयत्न करू नका.