निवडणूक आयोग आणि SIR प्रक्रियेविरोधात 'इंडिया' आघाडीच्या नेत्यांनी सुप्रीम कोर्टाकडे मोर्चा वळवला आहे. राहुल गांधींच्या 'चलो दिल्ली' हाकेला ममता बॅनर्जी, तेजस्वी यादव आणि अखिलेश यादव यांनीही पाठिंबा दिलाय.
मुंबई : निवडणूक आयोग आणि SIR प्रक्रियेविरोधात आता विरोधकांनी आक्रमक पवित्रा घेतलाय. 'इंडिया' आघाडीतील सर्व पक्ष एकत्र येत सुप्रीम कोर्टावर धडक देण्यासाठी निघाले आहेत. यामुळे आता मोठा संघर्ष पाहायला मिळण्याची शक्यता आहे.
पश्चिम बंगालच्या माजी मुख्यमंत्री ममता बॅनर्जी, बिहारचे माजी उपमुख्यमंत्री तेजस्वी यादव आणि यूपीचे माजी मुख्यमंत्री अखिलेश यादव यांनीही या मोर्चाला आपला पाठिंबा दिलाय. ममता बॅनर्जी म्हणाल्या, "आम्ही फक्त न्याय मागत आहोत, दुसरं काहीही नाही. हे लोकांसाठी, मानवतेसाठी आणि न्यायासाठी आहे... आम्हाला फक्त न्याय हवाय."
विरोधी पक्षनेत्यांचा संताप
काँग्रेस खासदार रेणुका चौधरी यांनी भाजप सरकारवर जोरदार टीका केली. त्या म्हणाल्या, "आम्ही जनतेसाठी लढणार आहोत आणि त्यांचा आवाज इथे ऐकला गेला पाहिजे, हे दाखवून देण्यासाठीच हा मोर्चा आहे. सरकार ज्या पद्धतीने बळाचा वापर करतंय आणि आम्हाला बेकायदेशीर ठरवतंय, ते थेट संविधानाचं उल्लंघन आहे. हे सरकार सुप्रीम कोर्टाचाही अपमान करतंय. कोर्टाचे आदेश डावलून त्यांनी आमच्यावर कारवाई केली. तुम्ही SIR बद्दल विचारता आणि ते FIR दाखल करतात. एक ज्ञानेश काय 'भारत देशा'पेक्षा मोठा आहे का?"
Related Articles
काँग्रेस खासदार गद्दाम वामसी कृष्णा म्हणाल्या, "आम्ही सर्व घटनात्मक संस्थांपर्यंत पोहोचण्याचा प्रयत्न करत आहोत, पण ते संविधानाचं रक्षण करत नाहीत."
निष्पक्ष निवडणुकांची मागणी
देशात निष्पक्ष निवडणुका व्हाव्यात यासाठी हा मोर्चा असल्याचं खासदार दीपेंद्र सिंह हुड्डा यांनी सांगितलं. ते म्हणाले, "देशातील सध्याची परिस्थिती कोणापासूनही लपलेली नाही. निवडणूक निकाल प्रभावित करण्यासाठी भाजप आणि निवडणूक आयोग संगनमत करत आहेत. याचे पुरावे आता समोर आलेत, म्हणूनच हे आंदोलन सुरू आहे. राहुल गांधींच्या नेतृत्वाखाली आम्ही पुन्हा एकदा आवाज उठवू. देशातील जनतेला निष्पक्ष निवडणूक आयोग आणि पारदर्शक निवडणूक प्रक्रिया मिळावी, हीच आमची मागणी आहे. जर मुख्य निवडणूक आयुक्तच भाजप उमेदवारांना मदत करत असतील, तर देशात काय उरेल? कसली लोकशाही राहील? शिवाय, दिल्ली पोलीस ज्या क्रूरपणे आंदोलकांचा आवाज दाबतात, ते अजिबात खपवून घेणार नाही. याच्याच निषेधार्थ आज आम्ही सुप्रीम कोर्टावर चालून जात आहोत."
लोकसभेचे विरोधी पक्षनेते राहुल गांधी यांनी दिलेल्या 'चलो दिल्ली'च्या हाकेला काँग्रेसचे मित्रपक्षही भक्कम साथ देत आहेत. समाजवादी पक्षाचे खासदार मोहिबुल्ला नदवी म्हणाले, "ही जनतेची लढाई आहे आणि ती अशीच सुरू राहील." तर, शिवसेना (उद्धव बाळासाहेब ठाकरे) पक्षाचे खासदार संजय राऊत यांनी स्पष्ट केलं की, "राहुल गांधी जे काही करतील, त्यासोबत आम्ही ठामपणे उभे आहोत."
राहुल गांधींच्या नेतृत्वात 'चलो दिल्ली'
तत्पूर्वी, मुख्य निवडणूक आयुक्त (CEC) ज्ञानेश कुमार यांच्याविरोधात सुप्रीम कोर्टाकडे जाण्याआधी राहुल गांधींनी दिल्लीतील AICC मुख्यालयात पत्रकार परिषद घेतली. पंतप्रधान मोदी हे ज्ञानेश कुमार यांना पाठीशी घालत असल्याचा आरोप त्यांनी केला. "आम्हाला हेच हवंय आणि सरकार मोठी चूक करतंय. कारण पंतप्रधान नरेंद्र मोदी हे ज्ञानेश कुमार यांना कसं वाचवत आहेत, हे आम्हाला देशाला दाखवून द्यायचंय," असं राहुल गांधी म्हणाले.
ते पुढे म्हणाले, "मतांची चोरी आणि ज्ञानेश कुमार यांच्या नेतृत्वाखालील निवडणूक आयोगाविरोधात 'चलो दिल्ली' हा लोकशाही वाचवण्याचा मोर्चा आहे. गेल्या चार-पाच दिवसांपासून दिल्लीत हे जनआंदोलन सुरू आहे. हा विरोध गेल्या १०-१२ वर्षांपासून आहे, पण आता तो अधिक तीव्र झालाय. प्रश्न हा आहे की: दिल्लीला तुरुंग का बनवलंय?"
मध्य दिल्लीत कडेकोट बंदोबस्त
या मोर्चाच्या पार्श्वभूमीवर मध्य दिल्लीत कडेकोट सुरक्षा व्यवस्था तैनात करण्यात आली आहे. अनेक ठिकाणी बॅरिकेड्स लावून सुरक्षा वाढवलीय. सुरक्षेच्या कारणास्तव १२ ऑक्टोबर रोजी दुपारी ४ वाजेपर्यंत काही मेट्रो स्टेशन्सचे प्रवेश आणि बाहेर पडण्याचे मार्ग बंद राहतील. मंडी हाऊसजवळील बाराखंभा रोडवर मोठ्या प्रमाणावर सुरक्षा रक्षक तैनात आहेत. दिल्ली पोलिसांसोबतच RAF (रॅपिड ॲक्शन फोर्स) आणि CRPF (केंद्रीय राखीव पोलीस दल) चे जवानही तैनात करण्यात आले आहेत.
