यूट्यूबर ध्रुव राठीने हिंदू देवतांच्या खाण्यापिण्याच्या सवयींबद्दल बनवलेला एक व्हिडिओ वादात सापडला आहे. या अपमानकारक व्हिडिओविरोधात तक्रार दाखल झाल्यानंतर, दिल्ली हायकोर्टाच्या आदेशानुसार गूगलने हा व्हिडिओ भारतातून डिलीट केला आहे.
नवी दिल्ली : केंद्र सरकार, हिंदूंविरोधात तसंच विविध विषयांवर व्हिडिओ तयार करणारा यूट्यूबर ध्रुव राठी पुन्हा एकदा चर्चेत आला आहे. त्याचं खरं नाव बद्रू आहे आणि त्याची पत्नी पाकिस्तानी आहे, अशा अफवा पसरवणारे अनेक व्हिडिओ व्हायरल झाले होते. काहींनी तर यासाठी पुरावे देण्याचा दावाही केला होता. अर्थात, ध्रुवने हे सर्व आरोप फेटाळले होते. पण आता त्याने हिंदू देवतांचा अपमान करणारा एक व्हिडिओ बनवल्याने मोठा वाद निर्माण झाला आहे. हा व्हिडिओ भारतातून डिलीट करण्यात आला असून, जगभरातून हटवण्यासाठी कारवाई सुरू असल्याची माहिती गूगलने दिल्ली हायकोर्टात दिली आहे.
'द केरला स्टोरी' आणि वाद
'द केरला स्टोरी' सिनेमात काहीच तथ्य नाही आणि 'लव्ह जिहाद'सारखं काहीही अस्तित्वात नाही, असं मानणाऱ्यांपैकी ध्रुव राठी एक आहे. याच संदर्भात त्याने 'द केरला स्टोरी 2' या विषयावर एक व्हिडिओ बनवला होता. त्यात त्याने हिंदू देवतांच्या खाण्यापिण्याच्या सवयींवर भाष्य केलं होतं. प्राचीन ग्रंथ, शास्त्र आणि आधुनिक सर्वेक्षणांचा हवाला देत त्याने दावा केला की, रामायण आणि महाभारत काळातील योद्धे वनवासात हरणाचं मांस आणि मद्य सेवन करत होते. या व्हिडिओमध्ये त्याने प्रभू रामचंद्र, श्रीकृष्ण आणि पांडवांच्या नावांचा उल्लेख केला होता.
याच पार्श्वभूमीवर, वकील अमिता सचदेव यांनी कोर्टात धाव घेतली. त्यांनी आपल्या याचिकेत म्हटलं की, या व्हिडिओतून हिंदू देवतांचा अपमान झाला आहे आणि गूगलला हा व्हिडिओ हटवण्याचे आदेश द्यावेत. कोर्टाने ही मागणी मान्य करत आदेश दिले. या आदेशानंतर, गूगलच्या वकिलांनी न्यायमूर्ती स्वरणा कांत शर्मा यांच्या खंडपीठाला माहिती दिली की, हा व्हिडिओ सध्या भारतातून डिलीट करण्यात आला आहे. मात्र, तो जगभरातून हटवण्याची विनंती हायकोर्टाच्या दुसऱ्या खंडपीठासमोर प्रलंबित आहे, असंही वकिलांनी स्पष्ट केलं.
Related Articles
याचिकाकर्त्याचा आरोप काय?
हा व्हिडिओ अपमानकारक, प्रक्षोभक आणि जातीय तेढ निर्माण करणारा आहे, असा आरोप याचिकाकर्त्या अमिता सचदेव यांनी केला आहे. त्यांनी राठीविरोधात मॅजिस्ट्रेट कोर्टात फौजदारी तक्रारही दाखल केली आहे. राठीने हिंदू धर्मग्रंथांची मोडतोड करून 'सनातन धर्माच्या पवित्रतेची खिल्ली उडवली' आहे, असं त्यांचं म्हणणं आहे. ३ जुलै रोजी हायकोर्टाने केंद्र सरकारला या अर्जावर निर्णय घेण्याचे निर्देश दिले होते. त्यानंतर, केंद्र सरकारच्या तक्रार निवारण अपील समितीने (Grievance Appellate Committee) हा व्हिडिओ ब्लॉक करण्याचे आदेश दिले होते. आता हा व्हिडिओ जगभरातून डिलीट करण्याच्या मागणीवर कोर्ट पुढील महिन्यात सुनावणी करणार आहे.
