बिहारच्या वैशाली जिल्ह्यात गंगा नदीत क्षमतेपेक्षा जास्त भरलेली बोट उलटून १३ मुलांचा दुर्दैवी मृत्यू झाला आहे. या घटनेनंतर एसडीआरएफने बचावकार्य सुरू केले असून राष्ट्रपती मुर्मू, पंतप्रधान मोदी आणि मुख्यमंत्री सम्राट चौधरी यांनी शोक व्यक्त करत मदतीची घोषणा केली आहे.
मुंबई : बिहारच्या वैशाली जिल्ह्यात बोट उलटून झालेल्या दुर्घटनेत १५ वर्षांखालील किमान १३ मुलांचा मृत्यू झाला. बुधवारी या दुर्दैवी मुलांच्या मृतदेहांवर अंत्यसंस्कार करण्यात आले.ही घटना मंगळवारी रात्री साडेआठच्या सुमारास राघोपूर दियारा भागातील रामपूर श्यामचंद गावाजवळ घडली. सुमारे २० मुले एका बोटीतून शेजारच्या गावात जेवणावळीसाठी जात होती. मात्र, क्षमतेपेक्षा जास्त गर्दी असल्याने ही बोट गंगा नदीत उलटली.
राष्ट्रपती मुर्मू यांच्याकडून शोक व्यक्त
या घटनेनंतर नदीत बचावकार्य सुरू असतानाच, राष्ट्रपती द्रौपदी मुर्मू यांनी बुधवारी या जीवितहानीबद्दल तीव्र दुःख व्यक्त केले. त्यांनी 'एक्स' (X) वर लिहिले की, "बिहारच्या वैशाली जिल्ह्यातील बोट दुर्घटनेत मुलांचा मृत्यू झाल्याची बातमी अत्यंत वेदनादायी आहे. मी शोकग्रस्त कुटुंबांच्या दुःखात सहभागी आहे. या अपघातात जखमी झालेले लवकर बरे व्हावेत, अशी मी प्रार्थना करते."
बचावकार्य वेगात सुरू
या दुर्घटनेनंतर एसडीआरएफने (SDRF) गंगा नदीत तातडीने शोध आणि बचाव मोहीम सुरू केली. वैशालीच्या जिल्हाधिकारी वर्षा सिंह यांनी दिलेल्या माहितीनुसार, सात जणांना सुखरूप बाहेर काढण्यात आले असून त्यांना नालंदा मेडिकल कॉलेज आणि हॉस्पिटलमध्ये (NMCH) दाखल करण्यात आले आहे. सध्या त्यांची प्रकृती स्थिर आहे.
Related Articles
पंतप्रधान मोदींकडून मदतीची घोषणा
पंतप्रधान नरेंद्र मोदी यांनीही या घटनेवर दुःख व्यक्त केले आहे. त्यांनी पंतप्रधान राष्ट्रीय मदत निधीतून (PMNRF) मृतांच्या नातेवाईकांना प्रत्येकी २ लाख रुपये, तर जखमींना ५० हजार रुपयांची आर्थिक मदत जाहीर केली आहे.
पंतप्रधान कार्यालयाने (PMO) 'एक्स'वर पंतप्रधानांचा संदेश शेअर केला आहे. त्यात म्हटले आहे की, "बिहारच्या वैशालीमध्ये बोट उलटून झालेली जीवितहानी अत्यंत क्लेशदायक आहे. या कठीण प्रसंगी माझ्या संवेदना शोकग्रस्त कुटुंबांसोबत आहेत. सर्व जखमी लवकर बरे व्हावेत यासाठी मी प्रार्थना करतो. स्थानिक प्रशासन बाधितांना सर्वतोपरी मदत करत आहे." तसेच, मृतांच्या नातेवाईकांना २ लाख आणि जखमींना ५० हजार रुपयांची मदत दिली जाईल, असेही पीएमओने स्पष्ट केले.
राज्य सरकार आणि विरोधकांची प्रतिक्रिया
याआधी, बिहारचे मुख्यमंत्री सम्राट चौधरी यांनीही मृतांच्या कुटुंबीयांना प्रत्येकी ४ लाख रुपयांची आर्थिक मदत जाहीर केली.
मंगळवारी, बिहार विधानसभेचे विरोधी पक्षनेते आणि राघोपूरचे आमदार तेजस्वी यादव यांनीही या घटनेवर दुःख व्यक्त केले. 'एक्स'वरील पोस्टमध्ये यादव म्हणाले की, जेवण करून परतत असताना बोट उलटली, तेव्हा बोटीत सुमारे ३० लोक होते. "काही मुले बोटीने जेवायला गेली होती आणि परत येताना बोट उलटल्याने अनेकांना जीव गमवावा लागला आहे. आतापर्यंत १४ मृतदेह बाहेर काढण्यात आले असून, सहा जणांना रुग्णालयात पाठवण्यात आले आहे आणि तीन जण सुरक्षित आहेत," असे ते म्हणाले.
