जर्मनीच्या बर्लिन शहरात एका रस्त्याला भारताच्या माजी पंतप्रधान इंदिरा गांधी यांचं नाव देण्यात आलं आहे. एका ट्राम प्रवासादरम्यान भारतीयांना हा रस्ता दिसला आणि त्यांना मोठा अभिमान वाटला.
जर्मनीच्या बर्लिन शहरात एका रस्त्याला भारताच्या माजी पंतप्रधान इंदिरा गांधी यांचं नाव दिलं आहे. ही गोष्ट समजल्यावर इंटरनेटवर भारतीयांची मान अभिमानाने उंचावली आहे. रफ्तार लांबा नावाचा एक भारतीय तरुण जर्मनीत राहतो. बर्लिनमध्ये ट्रामने प्रवास करताना त्याला या रस्त्याचं नाव दिसलं.
या ट्राम स्टॉपवर "Depot Indira-Gandhi-Straße Sports Forum" असं नाव लिहिलं आहे. सोप्या भाषेत सांगायचं तर, बर्लिनमधल्या एका रस्त्याला इंदिरा गांधींचं नाव दिलंय. लांबाने सांगितलं की, भारतीयांना याबद्दल माहिती असायला हवी. M13 ट्राम तिथे थांबते, असंही त्याने नमूद केलं. जर्मनीत एखाद्या भारतीयाच्या नावाने रस्ता असणं ही खूप मोठी गोष्ट आहे, असं तो म्हणाला.
इंदिरा गांधींच्या हत्येनंतर रस्त्याचं नामकरण
साहिल नावाच्या आणखी एका युजरने म्हटलंय की, जर्मनीत राहणाऱ्या भारतीयांना ही गोष्ट नक्कीच माहीत असायला हवी. या नावामागचा इतिहास पाहिला, तर १९८३ मध्ये जर्मन सरकारच्या निमंत्रणावरून इंदिरा गांधींनी जर्मनीचा अधिकृत दौरा केला होता.
Related Articles
शीतयुद्धाच्या (Cold War) काळात दोन्ही देशांमधले राजकीय आणि आर्थिक संबंध खूप मजबूत होते. १९८४ मध्ये इंदिरा गांधींची हत्या झाली. त्यानंतर पूर्व जर्मनीच्या सरकारने त्यांना श्रद्धांजली वाहण्यासाठी ८ नोव्हेंबर १९८५ रोजी "Liston Berger Strasse" या रस्त्याचं नाव बदलून "Indira Gandhi Road" असं ठेवलं.
हा व्हिडिओ पोस्ट करणाऱ्या लांबाने कॅप्शनमध्ये लिहिलंय की, जर्मनीच्या राजधानीत भारताच्या कन्येच्या नावाने रस्ता असणं ही खूप मोठी गोष्ट आहे. परदेशात भारताशी जोडलेली एखादी गोष्ट पाहिल्यावर एक वेगळाच अभिमान आणि आपुलकी वाटते, असंही तो म्हणाला.
विशेष म्हणजे, इंदिरा गांधींच्या नावाने या रस्त्याचं आणि ट्राम स्टॉपचं नामकरण करण्यासाठी भारताचे तत्कालीन उपराष्ट्रपती आर. व्यंकटरमण हे खास जर्मनीला गेले होते.
या माहितीमुळे अनेक युजर्सना अभिमान वाटतोय. काहींनी तर इंदिरा गांधी म्हणजे "ऑरा" (aura) असल्याचं म्हटलंय. कमेंट्समध्ये अनेक युजर्सनी त्यांच्या कामाचं कौतुक केलं. परदेशात एखाद्या भारतीयाचं नाव पाहिल्यावर प्रत्येक भारतीयाला आपुलकी वाटते, अशा भावना अनेकांनी व्यक्त केल्या.
