बंगळुरुमध्ये अपार्टमेंटच्या कॉरिडॉरमध्ये शू-रॅक ठेवणे पडले महाग, चक्क २४,००० रुपये दंड!
बंगळुरूच्या इलेक्ट्रॉनिक सिटीतील प्रेस्टीज सनराइज पार्कमधील रहिवाशाला फ्लॅटच्या बाहेर शू रॅक ठेवल्याबद्दल ₹२४,००० दंड आकारण्यात आला. कॉरिडॉरमध्ये वस्तू ठेवणे हे अग्निशामक सुरक्षा नियमांचे उल्लंघन आहे, असे अपार्टमेंटच्या रहिवासी संघाने म्हटले आहे.
बंगळुरू इलेक्ट्रॉनिक सिटी फेज १ मधील प्रेस्टीज सनराइज पार्क या अपार्टमेंटमध्ये, एका रहिवाशाला फ्लॅटच्या बाहेर शू रॅक ठेवल्याबद्दल तब्बल ₹२४,००० दंड आकारण्यात आला आहे. या अपार्टमेंट कॉम्प्लेक्समध्ये १,०४६ फ्लॅट आहेत. कॉरिडॉरमध्ये शू रॅक, कुंड्या आणि काही स्टोरेज बॉक्स ठेवणे हे अग्निशामक सुरक्षा नियमांविरुद्ध आहे, त्यामुळे कॉरिडॉर रिकामे ठेवण्याच्या सूचना अपार्टमेंटच्या रहिवासी संघाने सर्वांना दिल्या होत्या.
सर्व रहिवाशांना नोटीस
अपार्टमेंटमधील ५०% घरांमध्ये अशा वस्तू असल्याचे लक्षात आल्यानंतर, संघाने सर्व रहिवाशांना त्या काढून टाकण्याची नोटीस दिली आणि चर्चा केली. सर्वांना दोन महिन्यांचा अवधी देऊन वस्तू काढून टाकण्याची विनंती केली. याला अपार्टमेंटमधील बहुतेक लोकांनी संमती दर्शविली.
दोन रहिवाशांव्यतिरिक्त इतर सर्वांनी वस्तू काढून टाकल्या
सुमारे चार आठवड्यानंतर, दोन रहिवाशांव्यतिरिक्त इतर सर्वांनी कॉरिडॉरमधून वस्तू काढून टाकल्या. परंतु त्यातील एका व्यक्तीने शू रॅक काढण्यास नकार दिला. त्याने ₹१५,००० आगाऊ भरले आणि पुढील दिवसांचा दंड त्यातून वजा करा असे सांगितले. आता दंडाची रक्कम ₹२४,००० झाली आहे. सध्या दिवसाला ₹१०० दंड आकारला जात आहे. परंतु, अशाच प्रकारच्या वागण्यावर कठोर कारवाई करण्यासाठी, हा दंड दिवसाला ₹२०० पर्यंत वाढवण्याचा विचार संघ करत आहे.
सार्वजनिक जागा खाजगी वस्तू ठेवण्यासाठी नाही
"सार्वजनिक जागा खाजगी वस्तू ठेवण्यासाठी नाहीत. कॉरिडॉरमध्ये खाजगी वस्तू आगीच्या किंवा आपत्कालीन परिस्थितीत धोका निर्माण करू शकतात," असे रहिवासी संघाचे अध्यक्ष अरुण प्रसाद यांनी सांगितले. आपत्कालीन परिस्थितीत सुरक्षित स्थलांतर सुलभ करण्यासाठी बहुमजली इमारतींमधील कॉरिडॉर अडथळ्यांपासून मुक्त असले पाहिजेत, असे अग्निशामक सुरक्षा नियम सूचित करतात.
योग्य माहिती घेऊन त्यानुसार वागणे खूप महत्वाचे
प्रत्येक अपार्टमेंटमध्ये नियम असतात. स्थानिक प्रशासन देखील काही नियम घालून देते. तसेच अपार्टमेंट असोसिएशन देखील काही नियम आखते. त्यामुळे योग्य माहिती घेऊन त्यानुसार वागणे खूप महत्वाचे आहे, अन्यथा दंड भरण्याची तयारी ठेवावी लागते.
