आशियाई क्रीडा स्पर्धा २०२६ मध्ये भारताच्या कमलजीत आणि सुरुची इंदर सिंग या जोडीने १० मीटर एअर पिस्तूल मिश्र सांघिक प्रकारात सुवर्णपदक जिंकले आहे. या जोडीने आशियाई विक्रम मोडत भारताला स्पर्धेतील दुसरे सुवर्णपदक मिळवून दिले.
मुंबई : आशियाई क्रीडा स्पर्धा २०२६ मध्ये १० मीटर एअर पिस्तूल मिश्र सांघिक प्रकारात सुवर्णपदक जिंकल्याबद्दल केंद्रीय क्रीडा मंत्री मनसुख मांडविया यांनी भारतीय नेमबाज कमलजीत आणि सुरुची इंदर सिंग यांचे अभिनंदन केले आहे. मांडविया यांनी 'एक्स' (X) वर पोस्ट करत या जोडीच्या ऐतिहासिक कामगिरीचे कौतुक केले.
"भारतासाठी सुवर्ण! #AsianGames2026 मध्ये १० मीटर एअर पिस्तूल मिश्र सांघिक प्रकारात सुवर्णपदक जिंकल्याबद्दल कमलजीत आणि सुरुची इंदर सिंग यांचे मनःपूर्वक अभिनंदन," असे मांडविया यांनी आपल्या पोस्टमध्ये लिहिले. GOLD FOR BHARAT! 🥇🇮🇳 Heartiest congratulations to Kamaljeet and Suruchi Inder Singh on winning the Gold Medal in the 10m Air Pistol Mixed Team event at the #AsianGames2026.#Cheer4Bharat pic.twitter.com/aRNR7s88B4 — Dr Mansukh Mandaviya (@mansukhmandviya) September 25, 2026
हरियाणाच्या मुख्यमंत्र्यांकडून नेमबाजांचे कौतुक
आशियाई क्रीडा स्पर्धेत भारताला दुसरे सुवर्णपदक मिळवून दिल्यानंतर हरियाणाचे मुख्यमंत्री नायब सिंग सैनी यांनीही या दोन्ही नेमबाजांचे अभिनंदन केले. सुवर्णपदक जिंकणाऱ्या या संघातील दोन्ही खेळाडू हरियाणाचे आहेत. सुरुची इंदर सिंग ही झज्जरची तर कमलजीत रेवाडीचा रहिवासी आहे. मुख्यमंत्र्यांनी या दोन्ही खेळाडूंना शुभेच्छा देत आंतरराष्ट्रीय स्तरावरील त्यांच्या कामगिरीचे तोंडभरून कौतुक केले.
Related Articles
"तुमच्या या कामगिरीचा संपूर्ण देशाला अभिमान आहे; सोनेरी भविष्यासाठी खूप खूप शुभेच्छा," असे मुख्यमंत्री सैनी म्हणाले.
दमदार कामगिरी आणि नवा विक्रम
या जोडीने ४८४.६ गुण मिळवत दक्षिण कोरिया (४७८.०) आणि इराणचा (४१५.८) पराभव केला. विशेष म्हणजे, या वर्षीच्या सुरुवातीला उझबेकिस्तानने प्रस्थापित केलेला ४८१.३ गुणांचा आशियाई विक्रमही त्यांनी मोडीत काढला. भारताच्या खात्यात आता एकूण १९ पदके जमा झाली असून, यात दोन सुवर्ण, आठ रौप्य आणि नऊ कांस्य पदकांचा समावेश आहे.
सुरुची आणि कमलजीत यांनी पहिल्या फेरीपासूनच आघाडी घेतली होती. दक्षिण कोरियाने शेवटच्या क्षणी कडवे आव्हान देऊनही त्यांनी आपली आघाडी कायम ठेवली आणि अखेर ६.६ गुणांच्या फरकाने विजय मिळवला. त्यांचा अंतिम स्कोअर जागतिक विक्रमापेक्षा अवघ्या चार गुणांनी कमी राहिला. याआधी, भारतीय महिला क्रिकेट संघाने अंतिम फेरीत श्रीलंकेचा १४७ धावांनी पराभव करत भारताला स्पर्धेतील पहिले सुवर्णपदक जिंकून दिले होते.
