उत्तर प्रदेशातील आग्रामध्ये डॉ. बाबासाहेब आंबेडकरांच्या पुतळ्याची तोडफोड झाल्यानंतर स्थानिक आणि भीम आर्मीच्या कार्यकर्त्यांनी संताप व्यक्त केला. घटनेची माहिती मिळताच पोलिसांनी धाव घेत गावकऱ्यांशी चर्चा केली. पुतळ्याचे बोट तुटले असून नवीन पुतळा बसवण्याची तयारी सुरू असल्याचं पोलिसांनी सांगितलं. याप्रकरणी गुन्हा दाखल झाला आहे.
एका अज्ञात व्यक्तीने उत्तर प्रदेशातील आग्रा जिल्ह्यातील बरहन पोलीस ठाण्याच्या हद्दीत असलेल्या गोवल गावात डॉ. बाबासाहेब आंबेडकरांच्या पुतळ्याची तोडफोड केली. या घटनेनंतर स्थानिक नागरिक आणि भीम आर्मीचे कार्यकर्ते चांगलेच आक्रमक झाले. त्यांनी दोषींवर तात्काळ कारवाई करण्याची मागणी करत आंदोलन सुरू केलं.
भीम आर्मीचे आग्रा जिल्हाध्यक्ष रिंकू सेठ यांनी सोशल मीडियावर या तुटलेल्या पुतळ्याचे फोटो शेअर केले. त्यांनी आग्रा पोलिसांना या प्रकरणाची गंभीर दखल घेण्याची विनंती केली. त्यांनी तुटलेला पुतळा तात्काळ बदलावा आणि हे कृत्य करणाऱ्याला शोधून कडक कारवाई करावी, अशी मागणी केली. जर पोलिसांनी कारवाई केली नाही, तर संघटनेला रस्त्यावर उतरावं लागेल, असा इशाराही त्यांनी दिला.
भीम आर्मीच्या इतर कार्यकर्त्यांनीही सोशल मीडियावर या घटनेबद्दल पोस्ट केल्या. त्यांनी पोलिसांना तपास करून कायदेशीर कारवाई करण्याची मागणी केली.
पोलिसांनी दाखल केला गुन्हा
आग्रा पोलिसांनी सांगितलं की, एका अज्ञात व्यक्तीने आंबेडकरांच्या पुतळ्याचे बोट तोडल्याची माहिती त्यांना मिळाली होती. माहिती मिळताच बरहन पोलीस ठाण्याच्या अधिकाऱ्यांनी तात्काळ गावात धाव घेतली. त्यांनी घटनेची माहिती घेण्यासाठी स्थानिकांशी चर्चा केली.
आग्रा पोलीस आयुक्तालयाने सोशल मीडियावर माहिती देताना सांगितलं की, स्थानिक नागरिकांच्या मदतीने नवीन पुतळा बसवण्याची व्यवस्था केली जात आहे.
पोलिसांनी पुढे सांगितलं की, लेखी तक्रारीच्या आधारे गुन्हा दाखल करण्यात आला आहे. सध्या पुढील कायदेशीर कारवाई सुरू आहे. पोलिसांच्या माहितीनुसार, सध्या घटनास्थळी शांतता असून कायदा आणि सुव्यवस्था नियंत्रणात आहे.
स्थानिक नागरिक आणि भीम आर्मीचे कार्यकर्ते तुटलेला पुतळा पुन्हा बसवण्याची आणि दोषीला शोधून काढण्याची मागणी करत आहेत. पोलिसांनी अद्याप कोणत्याही संशयिताचे नाव जाहीर केलेले नाही.
