कॉलजेच्या अभ्यासासोबत 21 वर्षाच्या एका विद्यार्थिनीने स्वतःचा छोटासा बिझनेस सुरू केला आहे. पहिल्या 50 दिवसांतच तिने 15 लाख रुपयांची कमाई केली आहे. अभ्यासासोबत आता ती एक यशस्वी उद्योजिका म्हणूनही ओळखली जात आहे.
गुरुग्राम (7 नोव्हेंबर) : असाइनमेंट, लायब्ररी, परीक्षा आणि अभ्यास... कॉलेजच्या दिवसांत या गोष्टी अगदी सामान्य असतात. सगळे विद्यार्थी या गोष्टींवरच आपलं लक्ष केंद्रित करतात. पण 21 वर्षांची अनन्या अग्रवाल अभ्यासासोबतच एक छोटा बिझनेस चालवते. तिला यात लवकर यशही मिळालं आहे. बिझनेस सुरू केल्यानंतर पहिल्या 50 दिवसांत अनन्यानं 15 लाख रुपयांची कमाई केली आहे. आता अनन्या केवळ एक विद्यार्थिनीच नाही, तर एक उद्योजिका म्हणूनही ओळखली जात आहे.
अनन्या अग्रवाल मॅनेजमेंट स्टडीजची विद्यार्थिनी आहे. ती आता तिच्या शेवटच्या वर्षात आहे. अनन्यानं अभ्यास आणि इतर उपक्रमांद्वारे कॉलेजमध्ये आपली वेगळी ओळख निर्माण केली आहे. चांगल्या गुणांसोबतच तिनं एक नवीन विक्रमही प्रस्थापित केला आहे. गुरुग्राममध्ये तिनं एक व्हेजिटेरियन कॅफे सुरू केला आहे. आई-वडिलांच्या पाठिंब्याने आणि प्रोत्साहनाने तिनं हा हायजिनिक कॅफे सुरू केला आहे. हा फक्त एक व्हेजिटेरियन कॅफे नाही. म्हणूनच तो खूप लोकप्रिय झाला आहे आणि त्यातून चांगली कमाई होत आहे.
गप्पागोष्टींनाही इथं महत्त्व
या व्हेजिटेरियन कॅफेमध्ये विविध प्रकारचे खाद्यपदार्थ मिळतात. यासोबतच इथं मित्र, नातेवाईक आणि कुटुंबीयांसोबत गप्पा मारण्यालाही महत्त्व दिलं आहे. जेवणासोबतच गप्पा आणि संवाद साधता यावा म्हणून खास सोय करण्यात आली आहे. आपल्या कॅफेमध्ये जेवणारी प्रत्येक व्यक्ती ते एन्जॉय करू शकेल, या उद्देशाने अनन्या अग्रवालनं हा कॅफे सुरू केला आहे. तिची ही नवीन कल्पना लोकांना खूप आवडली आहे.
इथं इटालियन मेडिटेरियन आणि मेक्सिकन यांसारख्या लोकप्रिय पदार्थांना भारतीय टच देण्यात आला आहे. इथल्या खाद्यपदार्थांच्या सवयी, चव आणि परंपरेनुसार ते तयार करण्यात आले आहेत. त्यामुळे लोकांना हे पदार्थ खूप आवडत आहेत आणि दररोज ग्राहकांची संख्याही वाढत आहे.
बिझनेससोबतच कॉलेज
वडिलांसोबत कॅफे सुरू केलेल्या अनन्या अग्रवालनं आपल्या पालकांच्या बिझनेसमधील अनुभवाचा फायदा घेतला. यामुळे अनन्याचा बिझनेस खूप लवकर यशस्वी झाला. सध्या अनन्या एक यशस्वी उद्योजिका असली, तरी ती आपलं कॉलेज आणि अभ्यासात मागे पडलेली नाही. ती कॉलेजचे क्लासेस, परीक्षा, असाइनमेंट्स यासोबतच बिझनेसही सांभाळत आहे.
अवघ्या 21 व्या वर्षी अनन्या यशस्वीपणे बिझनेस करत आहे. कॉलेजच्या दिवसांतच तिनं आपल्या आवडीच्या क्षेत्रात काम करायला सुरुवात केली. याद्वारे तिनं आपल्या भविष्याची दिशा स्पष्ट केली आहे. तसंच, आगामी काळात उत्पन्न, नोकरी आणि पगार याबाबतही तिनं आतापासूनच निश्चितता मिळवली आहे.
