'रामायण' सिनेमातील हिरो-हिरोईनच्या फीची सध्या जोरदार चर्चा सुरू आहे. पण या सिनेमात राक्षसाची भूमिका साकारणाऱ्या विवेक ओबेरॉयने स्वतःसाठी एक रुपयाही घेतला नाहीये. मग त्याने ही करोडोंची फी नक्की कुणाला दिलीये, माहितीये का?
मुंबई : यश आणि रणबीर कपूर स्टारर 'रामायण' सिनेमाचा पहिला भाग उद्या जगभरात रिलीज होतोय. दिवाळीच्या सणासोबतच सध्या सगळीकडे 'रामायण'चीच हवा आहे. या सगळ्यात विवेक ओबेरॉयने आपल्या फीबद्दल केलेलं वक्तव्य सगळ्यांची मनं जिंकून घेतंय.
विवेक ओबेरॉय नक्की काय म्हणाला?
विवेकने सांगितलं की, "मी सिनेमाचे निर्माते नमित यांना थेट सांगितलं की मला या सिनेमासाठी एक नवा पैसाही नकोय. माझा ज्या चांगल्या कामावर मनापासून विश्वास आहे, त्यासाठी मला ही संपूर्ण फी दान करायची आहे. म्हणजेच, कॅन्सरशी झुंज देणाऱ्या लहान मुलांच्या उपचारासाठी मला हे पैसे द्यायचे आहेत."
तो पुढे म्हणाला, "मी नमित यांना हेही सांगितलं की तुम्ही जे अप्रतिम काम करत आहात, ते मला खूप आवडलंय. म्हणूनच मला तुमच्या पाठीशी उभं राहायचं आहे. हा सिनेमा भारतीय चित्रपटसृष्टीला जागतिक पातळीवर एक वेगळीच ओळख मिळवून देईल, असा माझा ठाम विश्वास आहे."
Related Articles
तसं पाहिलं तर विवेक ओबेरॉयने ही गोष्ट आताच सांगितलेली नाही. २०२५ मध्येच त्याने आपला निर्णय जाहीर केला होता. कॅन्सरवर उपचार घेत असलेल्या मुलांना मदत करण्यासाठी आपली संपूर्ण फी वापरण्याची शपथ त्याने तेव्हाच घेतली होती. विवेक ओबेरॉय गेल्या अनेक वर्षांपासून समाजसेवेचं काम करत आहे. नुकताच त्याने वयाच्या ५० व्या वर्षात पदार्पण केलं.
या निमित्ताने त्याने कॅन्सरशी लढा देणाऱ्या ५० मुलांच्या उपचाराची जबाबदारी उचलली. आगामी सर्वात मोठ्या सिनेमांपैकी एका सिनेमातून मिळणारी फी आपण या लहान रुग्णांना आणि त्यांच्या कुटुंबीयांना मदत म्हणून देणार असल्याचं त्याने जाहीर केलं होतं. याच कारणामुळे त्याने 'रामायण'मधून मिळणारी फी कॅन्सरग्रस्त मुलांना देण्याचं मोठेपण दाखवलंय. येत्या काळात कॅन्सरबद्दल मोठी जनजागृती करण्यासाठी एका एनजीओचा विस्तार करण्याचा निर्णयही त्याने घेतलाय.
'रामायण' सिनेमाबद्दल
बॉलिवूड अभिनेता रणबीर कपूरच्या बहुचर्चित 'रामायण' सिनेमाबद्दल लोकांमध्ये आधीच खूप उत्सुकता आहे. तब्बल ४,००० कोटी रुपयांच्या बजेटमध्ये बनत असलेला हा पौराणिक सिनेमा दोन भागांमध्ये रिलीज होणार असल्याचं चित्रपटसृष्टीतील टीमने सांगितलंय. याचा तिसरा भागही येणार असल्याची अनधिकृत चर्चा सध्या सुरू आहे.
विशेष म्हणजे, पहिला भाग रिलीज होण्याआधीच बॉक्स ऑफिसवर या सिनेमाने धुमाकूळ घातलाय. ॲडव्हान्स तिकीट बुकिंगच्या बाबतीत सिनेमाने नवा विक्रम रचला असून, रिलीजआधीच जगभरात १०० कोटींचा टप्पा ओलांडलाय. भारतीय सिनेमांमध्ये अशी कामगिरी करणारे सिनेमे खूपच कमी आहेत. आता या खास यादीत 'रामायण'चाही समावेश झालाय.
