प्रसिद्ध ज्वेलरी ब्रँड GIVA ने अखेर स्पष्ट केलं आहे की, क्रिती सेननची रक्षाबंधन जाहिरात मागे घेण्यामागे कर्मचाऱ्यांची सुरक्षा हे कारण होतं. जाहिरातीतील संदेशाशी आम्ही असहमत आहोत म्हणून ती हटवली नाही, असंही कंपनीने स्पष्ट केलं.
मुंबई : अभिनेत्री क्रिती सेननला घेऊन बनवलेली रक्षाबंधन जाहिरात मागे घेतल्यामुळे ऑनलाइन टीकेचा सामना करणाऱ्या GIVA या ज्वेलरी ब्रँडने अखेर आपलं मौन सोडलं आहे. 'मिमी' स्टार क्रिती सेननवर चित्रित केलेली ही जाहिरात मागे घेण्यात आली होती. लोकांच्या धार्मिक किंवा सांस्कृतिक भावना दुखावण्याचा आमचा कोणताही हेतू नव्हता, असं ब्रँडने म्हटलं आहे.
GIVA च्या संस्थापकांनी दिलं स्पष्टीकरण
GIVA चे संस्थापक इशेंद्र अग्रवाल यांनी एका निवेदनात म्हटलं आहे, "क्रितीसोबतच्या आमच्या रक्षाबंधन मोहिमेबद्दलच्या चर्चा मी पाहत आहे. विशेषतः, आम्ही मोहिमेच्या किंवा त्यामागील संदेशाच्या पाठीशी उभे राहिलो नाही, असा एक समज तयार झाला आहे. पण मला हे स्पष्ट करायचं आहे की, मोहिमेमागील आमच्या हेतूवर आमचा विश्वास कायम आहे. ही मोहीम क्रितीच्या सहकार्याने तयार करण्यात आली होती आणि कुटुंबांना एकत्र आणणाऱ्या रक्षाबंधनाचा सण साजरा करण्याच्या आमच्या समान विश्वासाचं ते प्रतिबिंब होतं. या मोहिमेमागील हेतू आणि भावनेवर आम्ही आणि क्रिती पूर्णपणे सहमत आहोत."
निवेदनात पुढे स्पष्ट करण्यात आलं आहे की, GIVA स्टोअर्समधील कर्मचाऱ्यांच्या सुरक्षेसाठी ही जाहिरात काढून टाकण्यात आली. "आमच्या काही स्टोअर्सभोवती परिस्थिती गंभीर बनू लागली आणि आमच्या टीमसाठी असुरक्षित वातावरण निर्माण झालं. त्यामुळे हा व्हिडिओ काढून टाकण्याचा निर्णय तातडीने घेण्यात आला. त्या क्षणी, आमच्या कर्मचाऱ्यांची आणि स्टोअर्सची भौतिक सुरक्षा सुनिश्चित करणं ही आमची पहिली जबाबदारी होती आणि मी त्यांना कधीही इजा होऊ देणार नाही," असंही त्यांनी नमूद केलं.
Related Articles
क्रिती सेननच्या कपड्यांवरून वाद
हा वाद GIVA च्या रक्षाबंधन जाहिरातीमुळे सुरू झाला. यात अभिनेत्री क्रिती सेननने डीप-नेक ब्लाउज आणि केप असलेला आयव्हरी रंगाचा लेहेंगा घातला होता. अनेकांना तिचा लूक आवडला, पण काही सोशल मीडिया युजर्सनी तिच्या कपड्यांवर प्रश्नचिन्ह उपस्थित करत ते सणासाठी अयोग्य असल्याचं म्हटलं.
क्रिती सेनननेही दिलं प्रत्युत्तर
या वादानंतर GIVA ने जाहिरात मागे घेतली आणि म्हटलं की ते भारतीय संस्कृती, परंपरा आणि सणांचा आदर करतात आणि भावना दुखावण्याचा त्यांचा हेतू नव्हता. यावर क्रितीनेही प्रतिक्रिया दिली. तिने प्रश्न केला की, एखाद्या महिलेच्या कपड्यांना तिच्या संस्कृती आणि परंपरेच्या आदराशी का जोडलं जातं? सोशल मीडियावर आपल्या भावना व्यक्त करताना तिने इन्स्टाग्रामवर लिहिलं, "सणांचं महत्त्व तुम्ही कोणत्या कपड्यात आहात यात नाही, तर तुमच्या भावना आणि परंपरेच्या अर्थात आहे. रक्षाबंधन हे संरक्षणाचं बंधन आहे. मी आणि माझी बहीण एकमेकांना राखी बांधतो. आम्हाला माहित आहे की आम्ही भावापेक्षा कमी संरक्षण देऊ शकत नाही. आम्ही एकमेकांच्या आरोग्यासाठी, आनंदासाठी आणि दीर्घायुष्यासाठी प्रार्थना करतो. आणि आमच्यासाठी ही प्रार्थना आणि वचन आमच्या कुत्र्यांसाठीही आहे! कारण तेही कुटुंब आहेत! तसंच, आपण महिलांना काय घालायचं हे सांगणं कधी थांबवणार आहोत?? एथनिक फॅशन गेल्या काही वर्षांत खूप बदलली आहे, पण तरीही एका महिलेचा तिच्या संस्कृतीबद्दलचा आदर फक्त तिच्या कपड्यांवरून मोजला जातो!! संस्कृती आणि परंपरा तिच्या हृदयात असतात, तिच्या नेकलाइनमध्ये नाही!"
दरम्यान, बॉलिवूड अभिनेत्री आणि भाजप खासदार कंगना रणौत आणि इतर अनेक राजकीय नेत्यांनीही सोशल मीडियावर यावर तीव्र प्रतिक्रिया दिल्या आहेत.
