दिशा सालियानचे वडील सतीश सालियान यांनी मुलीच्या मृत्यूच्या तपासावर नाराजी व्यक्त केली आहे. तपासातील विलंब, पोस्टमार्टमच्या वेळेबाबतचे प्रश्न आणि मृतदेह चुकीच्या व्यक्तीकडे सोपवल्याचा आरोप त्यांनी केला आहे.

दिशा सालियानच्या मृत्यूच्या तपासात गंभीर चुका, वडिलांचा आरोप

दिशा सालियानचे वडील सतीश सालियान यांनी मंगळवारी आपल्या मुलीच्या मृत्यूच्या तपासाच्या प्रगतीवर नाराजी व्यक्त केली. या प्रकरणाचा तपास दोन महिन्यात पूर्ण करायचा होता, तरीही अधिकाऱ्यांनी कोणतेही निकाल दिले नाहीत, असा आरोप त्यांनी केला आहे. ANI शी बोलताना त्यांनी आपल्या मुलीचा मृतदेह सोपवताना झालेल्या गैरप्रकारावरही प्रश्न उपस्थित केले. त्यांच्या नावे भलत्याच व्यक्तीकडे मृतदेह सोपवण्यात आला, असा आरोप त्यांनी केला.

ते म्हणाले, “दोन महिने उलटून गेले तरी मी समाधानी नाही; त्यांना या प्रकरणाचे निकाल देण्यासाठी दोन महिन्यांची मुदत होती. पण त्यांनी अजून काहीही माहिती दिलेली नाही. माझ्या नावाचा वापर करून भलत्याच व्यक्तीकडे मृतदेह सोपवणं, असं कसं होऊ शकतं? हे व्हायला नको होतं; ही त्यांची गंभीर चूक आहे.”

पोस्टमार्टमच्या वेळेची आठवण सांगताना सतीश सालियान म्हणाले की, त्यांना संध्याकाळी ६ वाजता मृतदेह मिळाला. त्याआधी दुपारी २:३० वाजता प्रक्रियेसाठी तो सोपवण्यात आला होता. या मधल्या वेळात नक्की काय झालं? असा प्रश्न त्यांनी विचारला. “मला ११ तारखेला दुपारी २:३० वाजता मृतदेह देण्यात आला. तो पोस्टमार्टमसाठी दुपारी २:३० वाजता सोपवण्यात आला होता आणि मला परत संध्याकाळी ६:०० वाजता मिळाला. त्यावेळेत ते लोक काय करत होते?” असं ते पुढे म्हणाले.

दिशा सालियानचा ८ जून २०२० रोजी मुंबईत मृत्यू झाला होता. तिचा मृत्यू सुरुवातीला अपघाती मृत्यू नोंद (ADR) म्हणून नोंदवला गेला होता. अभिनेता सुशांत सिंग राजपूतच्या काही दिवस आधी तिचा मृत्यू झाला होता. सुशांतच्या मृत्यूमुळेही मोठी हायप्रोफाईल चौकशी आणि सार्वजनिक वाद निर्माण झाला होता. मुंबई उच्च न्यायालयाने सीबीआयला औपचारिक प्रथम माहिती अहवाल (FIR) नोंदवून नव्याने तपास सुरू करण्याचे निर्देश दिले. तत्पूर्वी, वकील निलेश ओझा यांनी सोमवारी (२ नोव्हेंबर) सांगितले की, न्यायालयाच्या देखरेखीखाली चौकशीची मागणी करणारा अर्ज सीबीआय न्यायालयाने नोंदवला आहे. या प्रकरणी १८ नोव्हेंबरला सुनावणी होणार आहे. ANI शी बोलताना ओझा यांनी असा दावा केला की, घटनेला वर्षे लोटूनही महत्त्वाच्या साक्षीदारांचे जबाब वेळेत नोंदवले गेले नाहीत, त्यामुळे सर्वोच्च न्यायालयाच्या प्रस्थापित निकालांनुसार न्यायालयीन देखरेखीची मागणी करण्याची वेळ आली आहे. सर्वंकष चौकशीच्या मागणीसाठी सार्वजनिक सभेची योजनाही त्यांनी जाहीर केली. ओझा म्हणाले की, देशभरातील खासदारांना पत्रे पाठवून या कारणासाठी पाठिंबा देण्याची विनंती करण्यात आली आहे. "आम्ही याचं एका जनआंदोलनात रूपांतर करत आहोत. दिशा सालियानच्या प्रकरणाबाबत: आम्ही १९ नोव्हेंबरला संध्याकाळी ४:०० वाजता आझाद मैदानात जमणार आहोत. आम्ही देशातील प्रत्येक खासदाराला पत्र पाठवले आहे. आम्ही तुम्हा सर्वांना सहभागी होण्याचे आवाहन करतो. देशाचे प्रतिनिधी म्हणून कृपया आमच्या पाठीशी उभे राहा - सीबीआय चौकशीसाठी दबाव आणण्यासाठी तुमच्या प्रभावाचा वापर करा," अशी विनंती त्यांनी केली.