बॉबी देओल गेल्या काही वर्षांपासून आपल्या सिनेमांमुळे सतत चर्चेत आहे. आता त्याच्या 'बंदर' या सिनेमाबद्दल एक मोठी अपडेट समोर आली आहे. निर्माता निखिल द्विवेदी यांचा हा सिनेमा आता जगभरातील सिनेमागृहांमध्ये प्रदर्शित होण्यासाठी सज्ज झाला आहे.
बॉबी देओल बऱ्याच काळापासून मोठ्या पडद्यापासून दूर आहे. पण आता समोर आलेल्या माहितीनुसार, तो पुन्हा एकदा सिल्व्हर स्क्रीनवर जोरदार कमबॅक करण्यासाठी तयार झाला आहे. त्याचा बहुप्रतिक्षित 'बंदर' हा सिनेमा अखेर प्रेक्षकांच्या भेटीला येत आहे. विशेष म्हणजे, या सिनेमाने आंतरराष्ट्रीय स्तरावर आधीच धुमाकूळ घातला आहे. २०२५ मध्ये झालेल्या ५० व्या टोरंटो इंटरनॅशनल फिल्म फेस्टिव्हलमध्ये (TIFF) 'स्पेशल प्रेझेंटेशन' कॅटेगरीत सिनेमाचा प्रीमियर झाला होता, जिथे प्रेक्षकांनी त्याला डोक्यावर घेतलं. आता हा सिनेमा थिएटरमध्ये रिलीज होणार आहे.
कधी रिलीज होणार बॉबी देओलचा 'बंदर' सिनेमा?
बॉबी देओलच्या 'बंदर' सिनेमाची चाहते आतुरतेने वाट पाहत आहेत. काही वेळापूर्वीच सिनेमाचे निर्माते निखिल द्विवेदी यांनी इन्स्टाग्रामवर बॉबीचा एक खतरनाक लूक शेअर करत सिनेमाची रिलीज डेट जाहीर केली आहे. त्यांनी सांगितलं की, हा सिनेमा २२ मे २०२६ रोजी जगभरातील सिनेमागृहांमध्ये प्रदर्शित होईल. त्यांनी शेअर केलेला बॉबीचा लूक खूपच भीतीदायक दिसतोय. बॉबीच्या या नव्या पोस्टरवर चाहते कमेंट्सचा वर्षाव करत आहेत. एकाने लिहिलं, 'हा सिनेमा गेम चेंजर ठरेल.' सौरभ कुमार नावाच्या एका युझरने लिहिलं, 'बॉबी देओलच्या नेहमीच्या खलनायकी भूमिकांपेक्षा काहीतरी वेगळं बघायला मिळेल. आशा आहे की हा सिनेमा थिएटरमध्ये आपल्याला धक्का देईल.' तर काहींनी 'या सिनेमाची वाट पाहू शकत नाही' असं म्हटलं आहे. काही जणांनी हा सिनेमा ब्लॉकबस्टर ठरेल, असा विश्वास व्यक्त केला आहे. अनेकांनी हार्ट इमोजी शेअर केले आहेत. या सिनेमाचं दिग्दर्शन अनुराग कश्यप यांनी केलं असून, लेखन सुदीप शर्मा आणि अभिषेक बॅनर्जी यांनी केलं आहे. सिनेमाच्या स्टारकास्टबद्दल बोलायचं झाल्यास, यात बॉबीसोबत सान्या मल्होत्रा, राज बी शेट्टी, जितेंद्र जोशी, सपना पब्बी, इंद्रजीत सुकुमारन, रिद्धी सेन आणि नागेश भोसले मुख्य भूमिकेत आहेत.
बॉबी देओलचे आगामी प्रोजेक्ट्स
बॉबी देओल शेवटचा 'हरी हरा वीरा मल्लू' या सिनेमात दिसला होता. हा सिनेमा २०२५ मध्ये रिलीज झाला होता. या तेलुगू सिनेमात पवन कल्याण मुख्य भूमिकेत होता. २०२३ मध्ये आलेल्या 'ॲनिमल' सिनेमामधून बॉबीने जबरदस्त कमबॅक केलं होतं. हा सिनेमा ब्लॉकबस्टर ठरल्यानंतर त्याला एकापाठोपाठ एक मोठ्या सिनेमांच्या ऑफर्स मिळाल्या. त्याच्या आगामी सिनेमांबद्दल बोलायचं झाल्यास, तो सुपरस्टार थलापती विजयसोबत 'जन नायगन' या सिनेमात दिसेल. याशिवाय, तो यशराज फिल्म्सच्या 'अल्फा' या स्पाय थ्रिलर सिनेमातही दिसणार आहे. यामध्ये आलिया भट्ट आणि शर्वरी वाघ मुख्य भूमिकेत आहेत. या दोन्ही सिनेमांमध्ये बॉबी पुन्हा एकदा निगेटिव्ह भूमिकेत दिसणार आहे.
