हायवेवर गाडी चालवताना अचानक समोर म्हैस आल्याने एका कुटुंबाचा मोठा अपघात होता होता टळला. या घटनेचा डॅशकॅम व्हिडिओ व्हायरल झाला असून, नवऱ्याच्या प्रसंगावधानामुळे पत्नी आणि मुलीचा जीव वाचला. मात्र, सीट बेल्ट न लावल्याने रस्ते सुरक्षेवर सोशल मीडियावर चर्चा सुरू झाली आहे.
हायवेवर गाडी चालवताना एका सेकंदाचीही चूक किती महागात पडू शकते, हे दाखवणारा एक व्हिडिओ सध्या समोर आला आहे. ४ नोव्हेंबर रोजी एका हायवेवर एका व्यक्तीच्या प्रसंगावधानामुळे कुटुंबाचा मोठा अपघात होता होता टळला.
सोशल मीडियावर, विशेषतः एक्स (ट्विटर) वर व्हायरल झालेल्या या व्हिडिओमध्ये पती, पत्नी आणि एक लहान मुलगी कारमधून प्रवास करत असल्याचं दिसत आहे. गाडी हायवेवर असताना अचानक दुभाजकावरून एक म्हैस त्यांच्या गाडीसमोर येते. यावेळी ड्रायव्हिंग सीटवर बसलेल्या व्यक्तीने क्षणाचाही विलंब न करता गाडीला जोरदार ब्रेक लावला आणि स्टेअरिंग फिरवून गाडी कंट्रोल केली. त्यामुळे गाडी म्हशीला न धडकता सुरक्षितपणे पुढे गेली.
या व्यक्तीने दाखवलेल्या प्रसंगावधानामुळे त्याची पत्नी आणि लहान मुलीचा जीव वाचला. एका सेकंदाचीही चूक झाली असती, तर मोठा अनर्थ घडला असता.
नेमकं काय घडलं?
देशभरातील हायवेवर अनेकदा भटकी जनावरं अचानक रस्त्यावर आल्यामुळे मोठ्या अपघाताच्या घटना घडल्या आहेत. भरधाव वेगात असलेल्या गाड्यांसमोर अशी जनावरं आल्यास मोठा धोका निर्माण होतो.
या व्हायरल व्हिडिओमध्ये दिसत आहे की, हा व्यक्ती एका ट्रकच्या मागून गाडी चालवत होता. काही वेळाने तो फास्ट लेनमध्ये ओव्हरटेक करतो, त्याचवेळी दुभाजकावरून अचानक एक म्हैस समोर येते. यावेळी त्याने अत्यंत वेगाने ब्रेक दाबला आणि शेजारी बसलेल्या पत्नी आणि मुलीला वाचवण्यासाठी आपला हात त्यांच्यासमोर आडवा धरला.
यावेळी आश्चर्याची बाब म्हणजे, त्याच्या पत्नीने सीट बेल्ट लावला नव्हता. जर त्याने योग्य वेळी हात आडवा धरला नसता, तर अचानक मारलेल्या ब्रेकमुळे ती पुढे आदळली असती.
अत्यंत कठीण प्रसंगातही या व्यक्तीने शांत राहून गाडी रस्त्याच्या कडेला उभी केली. सुदैवाने या घटनेत कोणालाही इजा झाली नाही. अचानक मारलेल्या ब्रेकमुळे लहान मुलगी उभी राहिली होती, त्यानंतर आईने तिला मागे खेचून सुरक्षित बसवलं.
ही संपूर्ण घटना गाडीतील डॅशकॅममध्ये रेकॉर्ड झाली आहे. हा व्हिडिओ पाहिल्यावर लक्षात येतं की, थोड्याशा चुकीमुळे किती मोठा अपघात होऊ शकला असता.
रस्ते सुरक्षेवरून नेटकऱ्यांची चर्चा
कुटुंबाचा जीव वाचवल्याबद्दल सोशल मीडियावर, विशेषतः एक्सवर अनेक युजर्सनी या व्यक्तीचं कौतुक केलं आहे. मात्र, त्याचवेळी काही युजर्सनी सीट बेल्ट न लावल्याबद्दल कुटुंबावर टीकाही केली आहे.
अनेक युजर्सनी पत्नीने सीट बेल्ट न लावल्याबद्दल आणि लहान मुलीला पुढे बसवल्याबद्दल संताप व्यक्त केला आहे. हायवेवर भरधाव वेगात असताना अशी बेपर्वाई जीवघेणी ठरू शकते, असं मत अनेकांनी मांडलं आहे.
काही लोकांनी ड्रायव्हरच्या वेळेवर घेतलेल्या निर्णयाचं कौतुक केलं असलं तरी, सुरक्षिततेच्या नियमांकडे केलेल्या दुर्लक्षावरही बोट ठेवलं आहे.
ही घटना कोणत्या हायवेवर घडली, हे अद्याप स्पष्ट झालेलं नाही. तसंच स्थानिक प्राधिकरणाने याबाबत काही तपास सुरू केला आहे की नाही, हेही समजू शकलेलं नाही.
