कुटुंबातील दोष दूर करण्यासाठी पूजा करण्याच्या बहाण्याने मंदिरात आलेल्या महिलेवर लैंगिक अत्याचार केल्याप्रकरणी एका माजी पुजाऱ्याला सात वर्षांची शिक्षा आणि ५० हजार रुपयांचा दंड ठोठावण्यात आला आहे.
तिरुवनंतपुरम: कुटुंबातील दोष दूर करण्यासाठी विशेष पूजा करण्याच्या बहाण्याने एका महिलेवर लैंगिक अत्याचार केल्याची धक्कादायक घटना समोर आली होती. या प्रकरणी आता मंदिरातील माजी पुजाऱ्याला सात वर्षांची सक्तमजुरी आणि ५० हजार रुपयांचा दंड सुनावण्यात आला आहे. नेदुमंगाड येथील एससी/एसटी विशेष न्यायालयाने हा निकाल दिला. राजेश असे या आरोपीचे नाव असून तो मूळचा अलप्पुझा येथील रहिवासी आहे. २०१६ मध्ये अयरूर एडवा श्री वनमूर्ती भद्रादेवी मंदिरात ही घटना घडली होती. अयरूर पोलिसांनी या प्रकरणी गुन्हा दाखल केला होता. मंदिरात पूजेसाठी आलेल्या महिलेला कुटुंबातील दोष दूर करण्याचे आमिष दाखवून आरोपीने तिच्यावर अत्याचार केले होते.
तपासादरम्यान या प्रकरणात अनुसूचित जाती-जमाती अत्याचार प्रतिबंधक कायद्यानुसार (अॅट्रॉसिटी) गुन्हे घडल्याचे स्पष्ट झाले. त्यानंतर तत्कालीन अटिंगलचे सहाय्यक पोलीस अधीक्षक आदित्य आयपीएस यांनी या प्रकरणाचा तपास आपल्या हाती घेतला. नेदुमंगाड येथील एससी/एसटी विशेष न्यायालयात या खटल्याची सुनावणी पार पडली. पीडित महिला आणि साक्षीदारांनी दिलेल्या जबाबासोबतच वैज्ञानिक पुरावेही या खटल्यात अत्यंत महत्त्वाचे ठरले. या सर्व पुराव्यांच्या आधारे जिल्हा न्यायाधीश शहाजहान यांनी आरोपी राजेशला सात वर्षांची शिक्षा आणि ५० हजार रुपयांचा दंड ठोठावला. दंडाची ही रक्कम पीडितेला देण्याचे आदेशही न्यायालयाने दिले आहेत. सरकारी पक्षातर्फे सरकारी वकील अॅड. संदीप आणि अॅड. मनीष यांनी काम पाहिले.
