तेलंगणातील हुजुराबाद-करीमनगर हायवेवर एका भरधाव कारवरील नियंत्रण सुटल्याने ती थेट सिमेंटच्या भिंतीवर जाऊन आदळली. या भीषण अपघातात एका तरुणाचा जागीच मृत्यू झाला असून त्याचे दोन मित्र गंभीर जखमी झाले आहेत. जखमींवर सध्या रुग्णालयात उपचार सुरू आहेत.
गुरुवारी रात्री तेलंगणामधील हुजुराबाद-करीमनगर हायवेवर शालापल्ली बस स्टँडजवळ एक भीषण अपघात झाला. एका भरधाव कारवरील चालकाचे नियंत्रण सुटले आणि कार पलटी झाली. या अपघातात एकाचा मृत्यू झाला असून दोन जण गंभीर जखमी आहेत.
साई किरण असे मृत तरुणाचे नाव असून तो जम्मीकुंटा येथील रहिवासी होता. अपघाताच्या वेळी त्याचे मित्र रवी (रा. पेद्दापल्ली) आणि दीपक (रा. वीणावंका) हे देखील त्याच्यासोबत कारमध्ये होते.
कारची भिंतीला धडक, गाडीचा चक्काचूर
मिळालेल्या माहितीनुसार, भरधाव कारवरील नियंत्रण सुटल्याने ती एका घराबाहेरील सिमेंटच्या भिंतीवर जाऊन आदळली आणि त्यानंतर पलटी झाली. हा अपघात इतका भयंकर होता की यात गाडीचा अक्षरशः चक्काचूर झाला.
या अपघातात साई किरणचा जागीच मृत्यू झाला. तर रवी आणि दीपक गंभीर जखमी झाले. घटनेची माहिती मिळताच तातडीने मदतकार्य सुरू करण्यात आले. जखमींना सुरुवातीला जम्मीकुंटा सरकारी रुग्णालयात दाखल करण्यात आले. त्यानंतर पुढील उपचारांसाठी त्यांना एमजीएम (MGM) रुग्णालयात हलवण्यात आले आहे.
पाहा व्हायरल व्हिडीओ
पोलिसांचा तपास सुरू
अपघाताची माहिती मिळताच पोलिसांनी घटनास्थळी धाव घेतली. या प्रकरणी गुन्हा दाखल करण्यात आला असून कारवरील नियंत्रण नेमके कसे सुटले, याचा पोलीस आता तपास करत आहेत.
हायवेवर अतिवेगाने गाडी चालवणे किती जीवघेणे ठरू शकते, हे या अपघातातून पुन्हा एकदा समोर आले आहे. त्यामुळे वाहनचालकांनी गाडीचा वेग मर्यादित ठेवावा, सतर्क राहावे आणि वाहतुकीच्या नियमांचे पालन करावे, असे आवाहन केले जात आहे.
