मदुराई पोलिसांनी तनिष्क शोरूममधून चोरीला गेलेले १५ कोटी रुपयांचे हिरे आणि सोन्याचे दागिने जप्त केले आहेत. सीसीटीव्ही फुटेज आणि कर्मचाऱ्यांच्या चौकशीतून मिळालेल्या माहितीच्या आधारे तिघांना अटक करण्यात आली आहे.

Jewellery Heist : तनिष्क शोरूममधून चोरीला गेलेले १५ कोटींचे दागिने जप्त, तिघांना अटक

मदुराई (तामिळनाडू) : ११ आणि १२ नोव्हेंबर दरम्यान तनिष्क शोरूममधून चोरीला गेलेले १५ कोटी रुपयांचे दागिने जप्त करण्यात आले असून याप्रकरणी तीन आरोपींना अटक करण्यात आल्याची माहिती मदुराईचे पोलीस आयुक्त एस राजेंद्रन यांनी मंगळवारी दिली. एएनआयला दिलेल्या माहितीत राजेंद्रन म्हणाले की, ११ नोव्हेंबरच्या मध्यरात्री आणि १२ नोव्हेंबरच्या पहाटे ही चोरी झाली, त्यानंतर पोलिसांनी या प्रकरणाचा तपास करण्यासाठी अनेक विशेष पथके स्थापन केली होती.

ते म्हणाले की, १५ कोटी रुपये किमतीचे सुमारे ११.८४३ किलो हिरे आणि सोन्याचे दागिने शोरूममधून चोरीला गेले होते आणि आता संपूर्ण चोरीची मालमत्ता परत मिळवण्यात आली आहे. "११ नोव्हेंबरच्या मध्यरात्री आणि १२ नोव्हेंबरच्या पहाटे तनिष्क ज्वेलरी शोरूममध्ये मोठी चोरी झाली होती. आम्ही विविध विशेष पथके तयार केली, तपास केला आणि तीन आरोपींना अटक केली. या प्रकरणात, सुमारे १५ कोटी रुपयांची मालमत्ता - ज्यामध्ये ११.८४३ किलो हिरे आणि सोन्याचे दागिने होते, ते चोरीला गेले होते. आता सगळा मुद्देमाल जप्त करण्यात आला आहे," ते म्हणाले.

पोलीस आयुक्तांनी पुढे सांगितले की, तपासकर्त्यांनी सीसीटीव्ही फुटेज तपासले आणि शोरूमच्या कर्मचाऱ्यांची चौकशी केली. यातून आरोपींची ओळख पटवून त्यांना अटक करण्यासाठी महत्त्वपूर्ण धागेदोरे मिळाले. "आम्ही इतर पुराव्यांसह उपलब्ध सीसीटीव्ही फुटेजचा आधार घेतला. आम्ही दुकानातील कर्मचाऱ्यांचीही चौकशी केली, ज्यांनी काही महत्त्वाचे धागेदोरे दिले आणि त्या आधारे आम्ही आरोपींना अटक केली," ते पुढे म्हणाले.

या चोरीच्या प्रकरणातील मुख्य आरोपी निशांत याला १ डिसेंबरपर्यंत न्यायालयीन कोठडी सुनावण्यात आली आहे. सोमवारी मध्यरात्री बंगळुरूहून सेलमला खाजगी बसने प्रवास करत असताना धरमपुरी जिल्ह्यातील अधियामन कोट्टई पोलिसांनी त्याला अटक केली. त्यानंतर मदुराईच्या विशेष पोलीस पथकाने त्याला ताब्यात घेतले आणि शहरात आणले. मदुराई येथील एका प्रसिद्ध ज्वेलरी शोरूममधून ११.४ किलो सोने आणि हिऱ्यांचे दागिने चोरल्याप्रकरणी मुख्य आरोपी निशांत याला मंगळवारी न्यायदंडाधिकाऱ्यांसमोर हजर करण्यापूर्वी एसएस कॉलनी पोलीस ठाण्यातून नेण्यात आले. कडेकोट बंदोबस्तात न्यायालयात हजर करण्यापूर्वी निशांतला वैद्यकीय तपासणीसाठी मदुराई येथील सरकारी राजाजी रुग्णालयात नेण्यात येत आहे.

शहरात खळबळ उडवून देणाऱ्या या कथित चोरीच्या प्रकरणात सोमवारी मध्यरात्री मोठा ब्रेकथ्रू मिळाला. बंगळुरूहून सेलमला खाजगी बसने जात असताना धरमपुरी जिल्ह्यातील अधियामन कोट्टई पोलिसांनी निशांतला अडवून अटक केली. मदुराईच्या विशेष पोलीस पथकाने त्याला ताब्यात घेतले आणि शहरात परत आणले. येथे आल्यावर, तपासकर्त्यांनी एसएस कॉलनी पोलीस ठाण्यात निशांतची कसून चौकशी केली. चौकशीदरम्यान, त्याने चोरीच्या दागिन्यांचा उरलेला भाग मदकुलम भागातील कपलीश्वरी अम्मान मंदिराजवळील टेकडीवर लपवून ठेवल्याची कबुली दिली. त्याच्या माहितीवरून पोलिसांनी घटनास्थळी शोध मोहीम राबवून सुमारे ६.४ किलो सोने आणि हिऱ्यांचे दागिने जप्त केले.