अहमदाबादमध्ये मुलांचे भांडण सोडवायला गेलेल्या एका व्यक्तीवर तलवारीने प्राणघातक हल्ला करण्यात आला. या भयंकर घटनेचे सीसीटीव्ही फुटेज समोर आले असून, पोलिसांनी दोन भावांवर गुन्हा दाखल करून तपास सुरू केला आहे.
अहमदाबादमध्ये एका धक्कादायक घटनेचे सीसीटीव्ही फुटेज समोर आले आहे. मुलांची भांडणे थांबवून त्यांना घरी जाण्यास सांगितल्याने एका व्यक्तीवर तलवारीने जीवघेणा हल्ला करण्यात आला. ही घटना १० नोव्हेंबरला घडली. सीसीटीव्हीमध्ये एक तरुण तलवारीने वार करताना दिसत असून लोक जीव वाचवण्यासाठी धावपळ करताना दिसत आहेत. पोलिसांनी दिलेल्या माहितीनुसार, मोहम्मद हुसैन मोहम्मद मियाँ शेख यांच्यावर कैफ सलीम हाश्मी आणि तौसीफ कामिल हाश्मी या दोन भावांनी हा हल्ला केला.
हुसैन यांनी दाखल केलेल्या तक्रारीनुसार, १० नोव्हेंबरला रात्री १०.३० च्या सुमारास त्यांच्या चाळीतील काही मुले शेजारील मुलांसोबत भांडत होती. हुसैन यांनी मध्यस्थी करत हे भांडण सोडवले आणि सर्व मुलांना त्यांच्या घरी जाण्यास सांगितले.
त्यानंतर हुसैन चाळीच्या बाहेर उभे असताना, भांडण करणाऱ्या एका मुलाचे चुलत भाऊ असलेले कैफ आणि तौसीफ तिथे आले. मुलांना खेळण्यापासून का रोखले, अशी विचारणा करत त्यांनी हुसैन यांना शिवीगाळ करायला सुरुवात केली आणि त्यानंतर मारहाण सुरू केली.
Related Articles
हा वाद इतका वाढला की, कैफने आपल्या घरातून तलवार आणली आणि हुसैन यांच्यावर हल्ला केला. स्वतःचा बचाव करताना हुसैन यांच्या हाताला गंभीर दुखापत झाली. या घटनेनंतरही दोन्ही आरोपींनी, 'जर पुन्हा मुलांना खेळण्यापासून रोखले तर जीवे मारू', अशी धमकी दिल्याचे तक्रारीत म्हटले आहे.
पाहा सीसीटीव्ही व्हिडीओ
सीसीटीव्ही फुटेजमध्ये हा भयानक थरार स्पष्ट दिसत असून, आजूबाजूचे रहिवासी घाबरून पळताना दिसत आहेत.
या हल्ल्यानंतर हुसैन यांचा पुतण्या सलमान आणि इतर नागरिकांनी तातडीने धाव घेत त्यांना वाचवले. रुग्णवाहिका बोलावून त्यांना तात्काळ उपचारांसाठी रुग्णालयात दाखल करण्यात आले.
या घटनेनंतर पोलीस सीसीटीव्ही फुटेजच्या आधारे सखोल तपास करत आहेत. हुसैन यांच्या तक्रारीवरून पोलिसांनी गुजरात पोलीस कायदा (GPA) च्या कलम १३५(१) आणि भारतीय न्याय संहितेच्या (BNS) कलम ११८(१), ३५२, ३५१(३) आणि ५४ अंतर्गत गुन्हा दाखल केला आहे.
