कोचीमध्ये एका तरुणीवर लैंगिक अत्याचार करून तिचे नग्न फोटो व्हायरल करण्याची धमकी देणाऱ्या आरोपीला कोची पोलिसांनी ओडिशातील नक्षलग्रस्त भागातून बेड्या ठोकल्या आहेत. ट्रान्झिट वॉरंट मिळवून पोलिसांनी त्याला कोचीला आणले आहे.
कोची: तरुणीवर लैंगिक अत्याचार करून तिचे नग्न फोटो सोशल मीडियावर व्हायरल करण्याची धमकी देणाऱ्या ओडिशातील एका तरुणाला पोलिसांनी अटक केली आहे. सिद्धाब गामिदंगा (२४) असे या आरोपीचे नाव असून तो ओडिशातील रायगडा जिल्ह्यातील चंद्रपूर येथील मुनारगामचा रहिवासी आहे. एर्नाकुलम टाऊन नॉर्थ पोलिसांनी ही कारवाई केली. नक्षलवाद्यांचा प्रभाव असलेल्या ओडिशातील एका दुर्गम गावातून, गावकऱ्यांचा विरोध पत्करून कोची पोलिसांनी अत्यंत धाडसाने त्याला ताब्यात घेतले.
२०२४ पासून आरोपी आणि पीडित तरुणी एकमेकांना ओळखत होते. कलूरसह विविध हॉटेल्समध्ये त्याने तरुणीवर लैंगिक अत्याचार केले आणि मोबाईलमध्ये तिचे नग्न फोटो काढले. हे फोटो मित्रांना पाठवेन आणि सोशल मीडियावर व्हायरल करेन, अशी धमकी तो तिला देत होता. या त्रासाला कंटाळून तरुणीने एर्नाकुलम नॉर्थ पोलीस ठाण्यात तक्रार दाखल केली. आपल्यावर गुन्हा दाखल झाल्याचे समजताच आरोपीने थेट ओडिशा गाठले. तिथे चंद्रपूर गावात त्याने दुसऱ्या एका तरुणीशी लग्न केले आणि तो तिथेच राहू लागला.
आरोपीच्या मोबाईल टॉवर लोकेशनचा मागोवा घेत पोलीस आधी ओडिशातील लोजीगुडा येथे पोहोचले. पण तिथे आरोपीबद्दल काहीच माहिती मिळाली नाही. त्यानंतर पोलिसांनी त्याच्या पत्नीचा फोटो गावकऱ्यांना दाखवला, तेव्हा त्यांनी त्याला ओळखले. मग गावच्या सरपंचाच्या मदतीने पोलिसांनी पुढचा तपास सुरू केला. गावात पोलीस आल्याची कुणकुण लागताच आरोपीने आपला फोन स्विच ऑफ केला आणि तो लपून बसला. पण पोलिसांनी त्याचा शोध घेतलाच. मात्र, राज्याबाहेरचे पोलीस गावात आल्याचे पाहून गावकरी एकत्र आले आणि त्यांनी केरळ पोलिसांच्या पथकाला घेराव घातला. त्यानंतर ओडिशा पोलीस आणि स्थानिक प्रतिष्ठित नागरिक तिथे पोहोचले. त्यांनी आरोपीने केलेल्या गुन्ह्याची माहिती गावकऱ्यांना दिली.
हा भाग नक्षलग्रस्त असल्याने आरोपीला ताब्यात घेणे पोलिसांसाठी मोठे आव्हान होते. पण गावकऱ्यांचा राग शांत झाल्यावर पोलिसांनी त्याला बेड्या ठोकल्या. स्थानिक न्यायालयात हजर करून ट्रान्झिट वॉरंट मिळवल्यानंतर आरोपीला केरळमध्ये आणण्यात आले. एर्नाकुलम नॉर्थचे सब इन्स्पेक्टर मनोज, एससीपीओ सुमेश, प्रदीप आणि सीपीओ निशीद यांच्या पथकाने ही धडक कारवाई केली.
