बारुईपूर उपजिल्हा रुग्णालयात न्यायालयीन कोठडीतील एका कैद्याचा संशयास्पद मृत्यू झाला आहे. या घटनेमुळे परिसरात मोठी खळबळ उडाली असून पत्नीने हत्येचा आरोप केला आहे. नेमकं काय घडलंय? सविस्तर वाचा.
Crime News: बारुईपूर उपजिल्हा रुग्णालयात पुन्हा एकदा न्यायालयीन कोठडीतील कैद्याचा संशयास्पद मृत्यू झाला आहे. पोलिसांनी बोगस डॉक्टर म्हणून काम केल्याच्या आरोपाखाली बासुदेव नस्कर यांना अटक केली होती. त्यांच्या मृत्यूमुळे आता मोठी खळबळ उडाली आहे. पत्नीने थेट हत्येचा आरोप केला आहे. एकाच महिन्यात सलग दोन कैद्यांच्या मृत्यूमुळे रुग्णालयाची सुरक्षा आणि देखरेखीवर मोठे प्रश्नचिन्ह निर्माण झाले आहे.
याच महिन्यात बारुईपूर उपजिल्हा रुग्णालयात दोन कैद्यांच्या संशयास्पद मृत्यूची घटना घडली आहे. आता बोगस डॉक्टर असल्याच्या आरोपाखाली अटक करण्यात आलेले ४४ वर्षीय बासुदेव नस्कर यांचा मृत्यू झाला आहे. ते बारुईपूरच्या बेतबेरिया परिसरातील रहिवासी होते. त्यांची पत्नी सोनाली नस्कर यांनी आपल्या पतीची हत्या झाल्याचा गंभीर आरोप केला आहे. तसेच त्यांनी या संपूर्ण प्रकरणाची सखोल चौकशी करण्याची मागणीही केली आहे.
पत्नीचा नेमका आरोप काय?
पोलिसांनी बोगस डॉक्टर असल्याच्या आरोपाखाली बासुदेव नस्कर यांना अटक केली होती. तेव्हापासून ते न्यायालयीन कोठडीत होते. पत्नी सोनाली नस्कर यांना सोमवारी आपला पती आजारी असल्याची माहिती मिळाली. ही बातमी मिळताच त्या आधी तुरुंगात गेल्या. पण तिथे गेल्यावर त्यांना समजले की त्यांचे पती तुरुंगात नाहीत. त्यानंतर सोनाली यांनी थेट बारुईपूर उपजिल्हा रुग्णालय गाठले. त्यांनी रुग्णालयात जाऊन पाहिले तेव्हा पतीचे हात-पाय बेडला बांधलेले होते. पतीला या अवस्थेत पाहून त्या घरी परतल्या. त्या मंगळवारी सकाळी साडेदहाच्या सुमारास पुन्हा पतीला भेटण्यासाठी रुग्णालयात आल्या. पण तिथे पोहोचल्यावर त्यांना समजले की त्यांच्या पतीचा मृत्यू झाला आहे.
सोनाली यांचा आरोप आहे की, पतीला रुग्णालयात दाखल करण्यापासून ते त्यांच्या मृत्यूपर्यंत पोलिसांकडून त्यांना कोणतीही माहिती देण्यात आली नाही. पतीचा मृत्यू नेमका कोणत्या कारणाने झाला, असा सवालही त्यांनी उपस्थित केला आहे. आपल्या पतीची हत्या झाल्याचा त्यांचा दावा आहे. या संपूर्ण प्रकरणाची सखोल चौकशी व्हावी, अशी मागणी त्यांनी केली आहे. मृतदेह शवविच्छेदनासाठी पाठवण्यात येणार असल्याची माहिती मिळाली आहे. शवविच्छेदन अहवाल आल्यावरच मृत्यूचे खरे कारण स्पष्ट होईल.
दरम्यान, गेल्या १३ ऑक्टोबर रोजी याच बारुईपूर उपजिल्हा रुग्णालयाच्या बाथरूममध्ये अझहरुल लष्कर या आणखी एका कैद्याचा मृतदेह आढळून आला होता. या घटनेची चर्चा ताजी असतानाच आता पुन्हा एका कैद्याच्या संशयास्पद मृत्यूमुळे अनेक प्रश्न निर्माण झाले आहेत. एकाच महिन्यात एकाच रुग्णालयात दोन कैद्यांचा मृत्यू झाल्याने कैद्यांची सुरक्षा आणि उपचारादरम्यानच्या देखरेखीवर प्रश्नचिन्ह निर्माण झाले आहे. मात्र, बासुदेव नस्कर यांच्या मृत्यूचे कारण आणि कुटुंबाने केलेल्या हत्येच्या आरोपावर अद्याप पोलीस किंवा रुग्णालय प्रशासनाकडून कोणतीही प्रतिक्रिया आलेली नाही.
