डेटिंग अ‍ॅपवरून जॉब शोधणारी युवती व्हायरल

नोकरी शोधणे हे बऱ्याचदा तरुणांसाठी मोठे आव्हान असते. अनेक कंपन्यांमध्ये अर्ज पाठवून, मुलाखतींना उपस्थित राहून, आशेने वाट पाहिली तरीही काही वेळा नोकरी मिळत नाही. यामुळे लोकांना खूप मानसिक त्रास होतो. पण, कितीही प्रयत्न केले तरी नोकरी न मिळालेल्या एका युवतीने केलेले काम आता लोकांना आश्चर्यचकित करत आहे.

डेटिंग अ‍ॅप्स लोकांना डेट करण्यासाठी, प्रेम करण्यासाठी जोडीदार शोधण्यासाठी असतात, नाही का? तसेच Hinge हे डेटिंग अ‍ॅप आहे. पण, ही युवती या डेटिंग अ‍ॅपचा वापर करून योग्य प्रेम शोधत नाहीये. तर तिला योग्य अशी काही नोकरी आहे का ते शोधत आहे. एक्सवर (ट्विटरवर) युवतीने डेटिंग अ‍ॅपद्वारे अनेकांना पाठवलेल्या मेसेजचे स्क्रीनशॉट शेअर केले आहेत.

नोकरीसाठी अनेक अर्ज पाठवले तरी काहीच झाले नाही, असे युवती म्हणते. म्हणूनच गोष्टी वेगळ्या पातळीवर नेण्याची वेळ आली, असे तिचे म्हणणे आहे. युवतीने शेअर केलेल्या स्क्रीनशॉटमध्ये डेटिंग अ‍ॅपवर मॅच झालेल्या पुरुषांना तिने पाठवलेले मेसेज दिसत आहेत.

युवतीच्या प्रोफाइलशी मॅच झालेल्यांना तिने सध्या तुम्ही नोकरीसाठी लोक घेत आहात का, काही नोकरी आहे का, असे विचारले आहे, असे स्क्रीनशॉटमध्ये दिसून येते. एक्सवर (ट्विटरवर) शेअर केलेली पोस्ट २.१ दशलक्ष लोकांनी पाहिली आहे.

पोस्टवर अनेकांनी कमेंट्स केल्या आहेत. या प्रयोगात युवतीला नक्कीच नोकरी मिळेल, असे अनेकांनी म्हटले आहे. काहींनी तिची पात्रता काय आहे असे विचारले आहे. सध्या ऑडिओ इंजिनिअरिंग/स्टुडिओ हँड असे युवती म्हणते. कोणतीही नोकरी शिकण्यासाठी आणि करण्यासाठी ती तयार आहे, असेही ती म्हणते.