US Military Actions in 21st Century Led to 4 Million Deaths : अल जझीराच्या रिपोर्टनुसार, अमेरिकेने २१व्या शतकात १० देशांवर हल्ले करण्यासाठी ८ ट्रिलियन डॉलर्स खर्च केले.
US Military Actions in 21st Century Led to 4 Million Deaths : २१ व्या शतकात अमेरिकेने तब्बल १० देशांवर हल्ले केले आहेत. यासाठी अमेरिकेने पाण्यासारखा पैसा खर्च केला. आंतरराष्ट्रीय मीडिया 'अल जझीरा'ने याबद्दल एक रिपोर्ट प्रसिद्ध केला आहे. २००१ पासून सुरू झालेली ही हल्ल्यांची मालिका २०२६ मध्ये इराणपर्यंत पोहोचली आहे. अमेरिकेच्या चार वेगवेगळ्या राष्ट्राध्यक्षांच्या काळात हे हल्ले झाले, असंही या रिपोर्टमध्ये म्हटलं आहे.
अमेरिकेने अफगाणिस्तान, इराक, येमेन, पाकिस्तान, सोमालिया, लिबिया, सीरिया, व्हेनेझुएला, नायजेरिया आणि इराण या देशांवर लष्करी हल्ले केले. यात ड्रोन हल्ल्यांपासून ते थेट सैन्य घुसवण्यापर्यंतच्या कारवायांचा समावेश आहे. ब्राऊन युनिव्हर्सिटीच्या 'वॉटसन इन्स्टिट्यूट'ने एक अभ्यास केला आहे. त्यानुसार, या युद्धांमध्ये थेट हल्ल्यांमुळे ९,४०,००० लोकांचा मृत्यू झाला. पण हल्ल्यानंतर निर्माण झालेली भीषण उपासमार, उपचारांअभावी आणि गंभीर आजारांमुळे झालेले मृत्यूही यात जोडले, तर एकूण मृतांचा आकडा ४५ लाख ते ४७ लाखांच्या घरात जातो.
गेल्या २५ वर्षांत अमेरिकेने युद्धांवर जवळपास ५.८ ट्रिलियन डॉलर्स खर्च केले आहेत. याशिवाय, या युद्धांमध्ये सहभागी झालेल्या सैनिकांच्या उपचारांसाठी आणि इतर फायद्यांसाठी २.२ ट्रिलियन डॉलर्सचा खर्च अपेक्षित आहे. म्हणजे या हल्ल्यांमुळे अमेरिकेच्या तिजोरीवर एकूण ८ ट्रिलियन डॉलर्सचा बोजा पडला आहे. २०२६ च्या सुरुवातीला अमेरिका आणि इस्रायलने मिळून इराणवर केलेल्या हल्ल्यांमुळे पश्चिम आशियात पुन्हा एकदा युद्धाचे ढग जमले आहेत. अशा परिस्थितीत ही आकडेवारी समोर आली आहे. दहशतवाद संपवण्याच्या नावाखाली अमेरिकेने केलेल्या या लष्करी कारवायांमुळे अनेक देशांमध्ये राजकीय अस्थिरता निर्माण झाली. यामुळे लाखो लोकांना देश सोडून निर्वासित व्हावं लागलं, असंही रिपोर्टमध्ये स्पष्ट केलं आहे.
