Trump Warns of Annihilation as US Strikes Iran : शांतता करारावर सही केली नाही, तर एका संस्कृतीलाच संपवून टाकू, अशी धमकी अमेरिकेचे अध्यक्ष डोनाल्ड ट्रम्प यांनी इराणला दिली आहे. होर्मुझच्या सामुद्रधुनीवरून सुरू असलेल्या वादात दिलेली मुदत संपत आली असतानाच, अमेरिकेने खार्ग बेटावर हवाई हल्लाही केला आहे.
Trump Warns of Annihilation as US Strikes Iran : अमेरिकेचे अध्यक्ष डोनाल्ड ट्रम्प यांच्या एका धमकीने संपूर्ण जगाला मोठ्या संकटाच्या दारात आणून ठेवलं आहे. मी दिलेली मंगळवारची डेडलाईन संपण्याआधी इराणने शांतता करारावर सही केली नाही, तर आज रात्री एक संपूर्ण संस्कृती कायमची संपवली जाईल, असा थेट इशारा ट्रम्प यांनी दिला आहे. ट्रम्प यांनी 'ट्रुथ सोशल'वर एक पोस्ट शेअर करत इतिहासातील ही सर्वात भीतीदायक धमकी दिली.
"एक संपूर्ण संस्कृती आज रात्री संपेल आणि ती पुन्हा कधीच परत आणता येणार नाही. असं व्हावं अशी माझी इच्छा नाही, पण बहुतेक तेच घडेल," असं ट्रम्प यांनी आपल्या पोस्टमध्ये लिहिलं आहे. जगाच्या मोठ्या आणि गुंतागुंतीच्या इतिहासातील आजची रात्र ही सर्वात महत्त्वाच्या क्षणांपैकी एक असेल, असंही त्यांनी म्हटलं आहे. होर्मुझची सामुद्रधुनी (Strait of Hormuz) खुली करण्यावरून सुरू असलेला वाद मिटवण्यासाठी इराण तयार नसल्याने ट्रम्प यांनी हे टोकाचं पाऊल उचललं आहे.
इराणमधील वीज केंद्रं, पूल आणि इतर महत्त्वाच्या पायाभूत सुविधांना लक्ष्य करून मोठा हल्ला करण्यासाठी अमेरिकेचं सैन्य पूर्णपणे सज्ज झालं आहे. इराणकडून अद्याप कोणतीही अधिकृत प्रतिक्रिया आलेली नाही. पण ट्रम्प यांच्या या धमकीमुळे अणुयुद्धाची ठिणगी पडेल की संपूर्ण पश्चिम आशियाच उद्ध्वस्त होईल, या चिंतेत आंतरराष्ट्रीय समुदाय आहे. संयुक्त राष्ट्र (UN) आणि युरोपियन युनियन (EU) शांततेसाठी शेवटच्या क्षणी प्रयत्न करत आहेत. पण ट्रम्प यांनी दिलेली 'मंगळवारची डेडलाईन' संपायला काही तास शिल्लक असताना, संपूर्ण जगाने श्वास रोखून धरला आहे. आज रात्री जे काही घडेल, त्यामुळे जगाचं भविष्यच बदलू शकतं.
Related Articles
खार्ग बेटावर हल्ला
दरम्यान, इराणचं सर्वात महत्त्वाचं तेल निर्यात केंद्र असलेल्या खार्ग बेटावरील (Kharg Island) लष्करी तळांवर अमेरिकेने आज पहाटे जोरदार हवाई हल्ला केला. पण या हल्ल्यात बेटावरील तेल शुद्धीकरण प्रकल्प (oil refineries) किंवा तेल साठवण टाक्यांना कोणतंही नुकसान झालेलं नाही, असं अमेरिकेच्या संरक्षण अधिकाऱ्यांनी स्पष्ट केलं आहे. इराणची लष्करी ताकद कमी करणं हा या हल्ल्यामागील उद्देश होता. सध्या तेल प्रकल्पांना लक्ष्य करण्याचा कोणताही विचार नाही, असं यूएस सेंट्रल कमांडने (US Central Command) कळवलं आहे.
याआधी १३ मार्च रोजीही अमेरिकेने खार्ग बेटावर असाच हल्ला केला होता. त्यावेळी जवळपास ९० लष्करी तळ उद्ध्वस्त केल्याची माहिती आहे. सागरी सुरुंग (naval mines) ठेवण्याची ठिकाणं, मिसाइल साठवण्याची गोदामं आणि इतर महत्त्वाचे लष्करी बंकर्स त्यावेळी लक्ष्य करण्यात आले होते. इराणची जवळपास ९० टक्के तेल निर्यात खार्ग बेटावरूनच होते. त्यामुळे हे ठिकाण सामरिकदृष्ट्या अत्यंत महत्त्वाचं मानलं जातं.
