ऑस्ट्रेलियातील एका इटालियन शेफला पायनॅपल पिझ्झा बनवण्यास नकार दिल्याने नोकरी गमवावी लागली आहे. पिझ्झावर अननस टाकणे हा आपल्या संस्कृतीचा अपमान असल्याचे त्याचे म्हणणे होते. यावरून आता कायदेशीर वाद सुरू झाला आहे.
मुंबई : पिझ्झावर अननस (पायनॅपल) टाकण्याला विरोध करणे ऑस्ट्रेलियातील ब्रिस्बेनमधल्या एका इटालियन शेफला चांगलेच महागात पडले आहे. डेव्हिड टॅम्बुरेला असे या शेफचे नाव आहे. एका प्रायव्हेट पार्टीसाठी हॅम आणि पायनॅपल पिझ्झा बनवण्यास त्याने नकार दिला. पिझ्झावर अननस टाकणे हे इटालियन खाद्यसंस्कृतीच्या विरोधात असल्याचे त्याचे म्हणणे होते. या नकारानंतर त्याला कामावरून काढून टाकण्यात आले.
या शेफने अशी मागणी फेटाळून लावण्याची ही पहिलीच वेळ नव्हती. गेल्या चार वर्षांत त्याने सलग तिसऱ्यांदा असा पिझ्झा बनवण्यास नकार दिला होता. त्यामुळे या घटनेची सध्या जोरदार चर्चा सुरू आहे. कामावरून काढल्याच्या निर्णयाविरोधात त्याने ऑस्ट्रेलियाच्या 'फेअर वर्क कमिशन'कडे धाव घेतली होती, पण तिथेही त्याची याचिका फेटाळण्यात आली आहे.
प्रायव्हेट इव्हेंटसाठी पायनॅपल पिझ्झा बनवण्यास इटालियन शेफचा नकार
डेव्हिड टॅम्बुरेला हा ब्रिस्बेनमधील 'ला कोस्टा' (La Costa) रेस्टॉरंटमध्ये हेड शेफ म्हणून काम करत होता. याच दरम्यान त्याचे मॅनेजमेंटसोबत वाद झाले. रेस्टॉरंटला १५,००० ऑस्ट्रेलियन डॉलर्स (सुमारे ९ लाख रुपये) पेक्षा जास्त किमतीच्या एका प्रायव्हेट इव्हेंटची बुकिंग मिळाली होती.
Related Articles
या इव्हेंटसाठी ग्राहकाने हॅम आणि पायनॅपल पिझ्झाची मागणी केली होती. पण डेव्हिडने तो बनवण्यास स्पष्ट नकार दिला. पिझ्झावर अननस टाकणे हा आपल्या इटालियन संस्कृतीचा अपमान असल्याचे त्याने ठणकावून सांगितले.
फेअर वर्क कमिशनच्या नोंदीनुसार, गेल्या चार वर्षांत डेव्हिडने अशा प्रकारच्या सूचना पाळण्यास नकार देण्याची ही तिसरी वेळ होती. याआधी एकदा त्याने आपल्या मालकाला "इटालियन लोकांसाठी पिझ्झावर अननस न टाकणे किती महत्त्वाचे आहे, हे तपासून पाहा" असेही सुनावले होते.
अनेक देशांमध्ये पायनॅपल पिझ्झा आवडीने खाल्ला जातो. पण खवय्यांमध्ये, विशेषतः पारंपारिक इटालियन पिझ्झा आवडणाऱ्या लोकांमध्ये यावरून नेहमीच दोन गट पडलेले दिसतात.
शेफची कमिशनकडे धाव, पण याचिका फेटाळली
या वादानंतर अखेर डेव्हिडला आपली नोकरी गमवावी लागली. कामाच्या ठिकाणची त्याची वर्तणूक आणि कामगिरी यावर चर्चा करण्यासाठी रेस्टॉरंट मॅनेजमेंटसोबत एक बैठक झाली होती. त्यानंतर साधारण दोन आठवड्यांनी, २० मे रोजी त्याला कामावरून काढण्यात आले.
पण डेव्हिडने केवळ पायनॅपल पिझ्झाचाच मुद्दा उपस्थित केला नाही. कामाच्या ठिकाणी झालेल्या एका दुखापतीमुळेही आपल्याला काढण्यात आल्याचा आरोप त्याने केला. एका धातूच्या रेलिंगवर आदळून त्याच्या उजव्या हाताला फ्रॅक्चर झाले होते.
यानंतर आपली हकालपट्टी अन्यायकारक असल्याचे सांगत त्याने ऑस्ट्रेलियाच्या फेअर वर्क कमिशनकडे दाद मागितली.
पण कमिशनने त्याचा अर्ज विचारात घेण्यास नकार दिला. कारण त्याने दिलेल्या मुदतीनंतर हा अर्ज दाखल केला होता. तसेच, मुदतवाढ देण्यासाठी कोणतीही अपवादात्मक परिस्थिती नसल्याचेही कमिशनने स्पष्ट केले.
मंगळवारी हा निर्णय देण्यात आला. यात 'ला कोस्टा'ने शेफला कामावरून काढणे योग्य होते की नाही, यावर काहीही भाष्य करण्यात आले नाही. अर्ज उशिरा दाखल केल्यामुळे मूळ आरोपांची चौकशीच झाली नाही.
रेस्टॉरंटची बाजू आणि शेफची नवी नोकरी
या वादावर प्रतिक्रिया देताना 'ला कोस्टा'चे व्यवस्थापकीय संचालक इलियट इनग्राम यांनी 'डेली मेल'ला सांगितले की, "ही गोष्ट फक्त पिझ्झा टॉपिंगपुरती मर्यादित नाही." त्यांच्या म्हणण्यानुसार, शिस्तभंगाच्या कारवाईत पायनॅपल पिझ्झाचा वाद हा अनेक कारणांपैकी फक्त एक भाग होता.
विशेष म्हणजे, हे रेस्टॉरंट आता बंद झाले आहे. त्यामुळे कामाच्या ठिकाणच्या या विचित्र वादावर पडदा पडला आहे.
दुसरीकडे, डेव्हिड टॅम्बुरेलाने आपले काम सुरूच ठेवले आहे. त्याच्या लिंक्डइन प्रोफाईलनुसार, तो आता ब्रिस्बेनमधील वेस्ट एंड येथील 'डॉन जिनो' (Don Gino) या इटालियन रेस्टॉरंटमध्ये हेड शेफ म्हणून काम करत आहे.
यात आणखी एक रंजक गोष्ट म्हणजे, 'डॉन जिनो'च्या मेन्यूमध्येही पायनॅपल पिझ्झाचा समावेश नाही.
या संपूर्ण प्रकरणाने पायनॅपल पिझ्झाच्या जुन्या वादाला पुन्हा एकदा तोंड फोडले आहे. काहींना ही गोड आणि तिखट चव आवडते, तर काहींच्या मते पिझ्झाच्या पारंपारिक रेसिपीशी छेडछाड करू नये.
