युकेंमध्ये भारतीय वंशाच्या युवतीचा मृतदेह कारमध्ये आढळला

लंडन: युकेमध्ये भारतीय वंशाच्या एका युवतीच्या हत्येप्रकरणी अधिक माहिती समोर आली आहे. २४ वर्षीय हर्षिता ब्रेलला गळा दाबून खून केल्याचे पोस्टमार्टम अहवालात म्हटले आहे. फरार असलेल्या पती पंकजचा शोध घेण्यासाठी ६० गुप्तहेरांचे पथक तपास करत आहे.

यावर्षी एप्रिलमध्ये हर्षिता पंकजसोबत ब्रिटनमध्ये आली होती. हर्षिता दिल्लीची रहिवासी होती. १० नोव्हेंबर रोजी संध्याकाळी कुटुंबियांनी हर्षिताशी शेवटचे बोलणे झाले होते. हर्षिताने कुटुंबियांना सांगितले की ती जेवण बनवून तिच्या पतीची वाट पाहत आहे. त्यानंतर दोन दिवस हर्षिताचा फोन बंद होता. १३ नोव्हेंबर रोजी कुटुंबियांनी नॉर्थम्प्टनशायर पोलिसांशी संपर्क साधला. पोलिस घरी आले, पण काहीही सापडले नाही.

१४ नोव्हेंबर रोजी सकाळी पूर्व लंडनमधील इलफोर्ड येथील ब्रिस्बेन रोडवर उभ्या असलेल्या कारच्या डिक्कीत मृतदेह सापडला. नॉर्थम्प्टनशायरमधील घरापासून १४५ किलोमीटर अंतरावर हे ठिकाण आहे. पोलिसांचा असा अंदाज आहे की नॉर्थम्प्टनशायरमध्ये हर्षिताचा खून करून पंकजने मृतदेह फेकून दिला. त्यानंतर पंकज देश सोडून पळून गेला. ६० हून अधिक गुप्तहेर सीसीटीव्ही फुटेजसह तपास करत असल्याचे नॉर्थम्प्टनशायर पोलिसांनी सांगितले.

तपासात हर्षिता घरगुती हिंसाचाराचा बळी असल्याचे आढळून आले. सप्टेंबरमध्ये हर्षिताने पतीविरुद्ध घरगुती हिंसाचाराचा संरक्षण आदेश मिळवला होता. मृत्यूपूर्वीच्या काळात या जोडप्याच्या घरातून वादावादीचे आवाज येत असल्याचे शेजारी सांगतात. मुलीच्या हत्येला जबाबदार असलेल्यांना कायद्यासमोर आणून मुलीला न्याय मिळवून द्यावा, अशी मागणी पालकांनी केली आहे.